IKINGS IMINCELE INKUNDLA YANGAKUBO
UBONGANI Ngidi onguSihlalo weReal Kings United egijima kwiNational First Division (NFD) uzwakalise ukuthi ngeke akuthole ukuphumula engakalifezi iphupho labalandeli bale kilabhu lokuthi imidlalo yasekhaya iyidlalele eHammarsdale Stadium, eMpumalanga ngaphandle kwasePinetown.
IKings izogijima umdlalo wayo wokuqala wasekhaya weNFD neWitbank Spurs ngoMgqibelo ngo15h00 eSugar Ray Xulu Stadium, eClermont. Ivule isizini yeNFD ngephuzu ibambana nomkhaya iRichards Bay FC ngo-1-1 eMhlathuze Sports Complex ngeledlule.
IKings igijima isizini yayo yesibili kulesi sigaba njengoba inyukele kusona nyakenye. Nakuba kujabulise abalandeli bayo ukunyukela kulesi sigaba kodwa bayakhala ngokuthi le kilabhu idlala kude naseHammarsdale njengoba isebenzisa iSugar Ray Xulu Stadium.
Isizathu sokusebenzisa kweKings le nkundla wukuthi iPremier Soccer League (PSL) kayiyiphasisanga iHammarsdale Stadium, ikhale ngokuthi kayisekho sesimweni sokusingatha imidlalo yalesi sigaba. ILANGA lithole ukuthi uNgidi uwa evuka ezama ukuxoxa noMasipala weTheku ukuba uba-lungisele le nkundla ukuze babu-yisele imidlalo yabo yasekhaya kuyona.
UNgidi ethintwa ukuphawula ngalolu daba, ukuqinisekisile uku- thi basemizamweni yokuthi le sizini iphele sebegijima eHammarsdale.
“Sizama ngawo wonke amandla ukuthi imidlalo yethu ibuyele eHammarsdale okuyisizinda sethu. UMasipala ungithembise ukuthi ezinyangeni ezimbili kuya kwezintathu inkundla izokube isikulungele ukusingatha imidlalo yalesi sigaba. Ngihlalele ethembeni,” kusho uNgidi oqhube ngokuthi umdlalo wabo neSpurs njengoba usekhaya noma kanjani kufanele bawunqobe. Uphethe ngokunxusa abalandeli ukufika ngobuningi njengoba kungenwa mahhala.
Isiyonke imidlalo yeNational First Division (NFD) engempelasonto imi kanje:KUSASA NGOLWESIHLANU E-Athlone: Cape Town All Stars vs Richards Bay FC 15h00. NGOMGQIBELO EHarry Gwala: Royal Eagles vs Highlands Park 15h00.
ESugar Ray: Real Kings United vs Witbank Spurs 15h00.
E-Athlone: Stellenbosch vs uThongathi FC 15h00.
EGoble Park: Super Eagles vs Mbombela United 15h00. NGESONTO EGiyani: Black Leopards vs Ubuntu Cape Town 15h00.
EMthatha: Mthatha Bucks vs Tshakhuma Tsha Madzivhadila 15h00.
E-Olen Park: Jomo Cosmos vs Pretoria University FC 15h00.