KUHLASELWE I-SAPS KWEZOKUXHUMANA NGOLUKAMBALULA
UHLASELWE ngamazwi ahlabayo ezinkundleni zokuxhumana iSouth African Police Services (SAPS) emuva kokuvela kwemibiko ethi kunetulo elakhiwa ngaphakathi emaphoyiseni lokusoconga uNgqongqoshe wamaPhoyisa, uMnu Fikile Mbalula, nomndeni wakhe.
Kukhona abebethi kumele uhlakazwe wonke umbutho wamaphoyisa, abanye bethi kade kwakushiwo ukuthi lo mbutho ufuye izigelekeqe.
Iphephandaba lesiNgisi eliphuma ngeSonto, iCity Press, libike izolo ukuthi linombiko obhaliswe ngaphansi kophiko oluwumshoshaphansi olubizwa ngeProject Wonder, oluhlanganiswe yizinhloli ezingezwamshini, amalunga ePolice Crime Intelligence, yizikhulu zoKlebe namalunga eSAPS.
Lo mbiko uqukethe ukucushwa komakhalekhukhwini bongqongqoshe abayisihlanu, wukuthi bebuzotshalwa kanjani ubufakazi obuthile ukuze “kubhajwe esifeni” uMnu Mbalula axoshwe, nokuba kusetshenziswe izintokazi ezisencane ukumyengela oPhathe.
Leli tulo linyakazise abaningi njengoba ezinye izisebenzi zehhovisi likaMnu Mbalula nezihlobo zazo, sebehlale belandelwa ngonogada bezinga eliphezulu. Sebephoqeleke ukuba babe ngomadlantule ( nomads) - njengoba bengasalali endaweni eyodwa izinsuku ezidlule kwezimbili.
I-City Press ithi uMnu Mbalula uyawukholwa lo mbiko ngenxa yokuthi ukhuluma nangemihlangano yena nethimba lakhe abebeyingxenye yayo. Uvumile futhi ukuthi uwutholile lo mbiko.
“Ngeke nje sibavumele osikhwili phambana nobhoko emaphoyiseni, bazama ukusiphazamisa emsebenzini esiwenzayo. Sibhekene nomsebenzi esiwuthunywe ngumengameli (Jacob Zuma) ne-African National Congress (ANC),” kusho yena.
Uthe lo mbiko uzophenywa ngumphenyi-jikelele wezobunhloli. Usomaqhinga kaMnu Mbalula, uMnu Bongani “Bo” Mbindwane, uthe uyazi ukuthi yini isisusa saleli tulo.
Kusolwa ukuthi uMnu Mbalula uzidonsele amanzi ngomsele ngokumisa izikhulu ezintathu zamaphoyisa.
Ubephansi phezulu ezama ukuba uMnu Richard Mdluli, obeyinhloko yePolice Crime Intelligence - osehole iminyaka engaphezu kweyisi-6 emisiwe - angabe esawunuka umholo wakhe.
Uholele ekubeni noMnu Berning Ntlemeza aphelelwe yitoho njengenhloko yoKlebe emuva kwesinqumo seNkantolo eNkulu yasePretoria ebesithi ukuqokelwa kwakhe kulesi sikhundla bekungekho emthethweni.
UMnu Mbalula walile ukuba uMnu Ntlemeza abuyele emsebenzini ngokuqala kwalo nyaka.
Lo ngqongqoshe ubambe iqhaza ekumisweni kweBamba likaKhomishana wamaPhoyisa, uKhomotso Phahlane, emuva kophenyo lwe-Independent Police Investigative Directorate mayelana nezinsolo zenkohlakalo. UKhomishana Phahlane uthe yena akahlangene netulo lokusocongwa kukaMnu Mbalula, wathi akakaze awubone nombiko lowo.
UMnu Ntlemeza uthe lo mbiko yinsambatheka yoqobo futhi akakaze awubone. UMnu Mdluli yena akatholakalanga. News24