Usola uzakwabo ophenywayo
Kuyimanje uthi uhlafuna ejeqeza
UKHALA ngokuboshelwa amanqina enyathi nguzakwabo anaye ebhizinisini owesifazane okusanda kuvela izinsolo zokuthi uzixebulele umkhoma ezizumbulwini zamathenda eHhovisi likaNdunankulu KwaZulu-Natal, uMnu Willies Mchunu.
UNkz Gugu Kheswa (48) - ongumnikazi wePhumalanga Communications, okuyinkampani ehlela imicimbi - kuvele ukuthi usethole amathenda abalelwa ku-R22 million ehhovisi likandunankulu eminyakeni emine edlule.
Uthi okumangalisayo wukuthi ogunyaze uphenyo nguzakwabo anaye ebhizinisini, osebenza ehhovisi lomgcinimafa KwaZuluNatal, uNkk Motlalepula Radebe.
UNkz Kheswa uthi benoNkk Hadebe bebenenkampani abayisungule ngowezi-2013 ebizwa ngeLanespace Oils - ibisungulelwe ukusebenza ngezowoyela.
Utshele leli phephandaba - abezifikele mathupha emahhovisi alo ngoLwesithathu olwedlule - ukuthi yena njengomhleli wemicimbi imali kayiyi ephaketheni lakhe kodwa uthola u-10% kuphela ngomcimbi asuke ewuhlela. Echaza udaba lwakhe, uthi kwiLanespace nguyena obenza yonke into kuyona okuthe emuva kokuba kube nokungaboni ngaso linye abenabo bathi makaphume, wenqaba.
“Kuyangimangalisa ukuthi emuva kokungaboni ngaso linye noNkk Radebe, nguyena osegunyaza ukuba kuphenywe mina. Ngenqaba ukuphuma kule nkampani ngoba yimi obephansi phezulu ivulwa, ukuthola imvume yokusebenza, wukuhamba imihlangano eGoli konke bekwenziwe yimi.
“Bathi mangiphume enkampanini ngoba kuthe ngowezi-2015 uNkk Hadebe nomyeni wakhe - sekufufusa ithenda yokuthutha uwoyela kwaShell - baba nomona, bacela omunye uzakwethu ukuba bangivotele ngasese ngikhishwe enkampanini ngoba kanginaso isikhathi.
“Lo omunye uzakwethu unqabile ukwenza lokho wangitshela ukuthi laba bebembizele emhlanga- nweni bethini. Ngimthintile uNkk Hadebe ngifuna ukwazi kahle ngale nsambatheka, wavuma ukuthi bakukhulumile impela lokho emhlanganweni ngoba bengibona ngimatasa nePhumalanga. Ngimtshele emehlweni ukuthi ngeke ngiphume ngoba iningi imali esengiyichithile ngiyibhalisa.
“Ngibatshele ukuthi uma befuna ukungikhipha, ngicela banginike u-R300 000 wezindleko zami, behluleka. Bathe bazonginika kancane kancane uma sebeqalile ukusebenza, mangilethe wonke amaphepha enkampani ukuze baqale ukusebenza ngenqaba.
“Ngithe bazowathola uma sebengikhokhele le mali engiyidingayo futhi noma ngabe bathi mangiqhubeke ngisebenze nabo, ngeke ngisakwazi ngoba sebekhombise ubu- nyoka imali ingakangeni nakungena ebhizinisini.
“Ngigcine ngingabanikanga amaphepha waze wabadlula umsebenzi. Baqale lapho ukungisongela bethi ngeke baze baphumule bengakangiqumbi phansi, ngiyoze ngidayise nomuzi enginawo ngikhokhela abameli,” kusho uNkz Kheswa.
Uthi uNkk Hadebe ngendlela abebemsongela ngayo, uke waze wagadwa ngoba ubesedliwa yingebhe. Ngaleso sikhathi uthi ubeseke alandelwe ngabantu angabazi.
Uthi ubesezitshela ukuthi le nto isidlulile kanti basazophinde bazame ukumqumba phansi.
Utshele leli phephandaba ukuthi unovalo ngoba akazi ukuthi yikuphi abasazokwenza njengoba bezame behluleka ukumcekela phansi.
“Kakukhona ukuthi nginika abangani bami imisebenzi, ngiqasha itende ngilikhokhele njengoba kwenziwa uma uhlela umcimbi. Kuthe uma kuvela lolu daba, nganikela ehhovisi likandunankulu ngiyozwa ukuthi kangihambisanga kuphi ngendlela.
“Ngikhulume noMnu Ziphathe Cibane oyiChief Financial Officer wathi bebengazi ngalolu phenyo, ngase ngimtshela ngabantu abafike bethi bazongiphenya bethunywe nguNkk Radebe baze banginika nencwadi esayinwe nguyena. Umangalile uma sengimtshela ukuthi uNkk Hadebe lo nginebhizinisi engilenza naye,” kusho uNkz Kheswa.
UNkk Hadebe uvumile ukuthi uyamazi uNkz Kheswa. Uthe inkampani le athi bebenayo ngokwazi kwakhe kade yavalwa futhi yayingakaze isebenze.
“Kakusilo iqiniso ukuthi sike saba nokungaboni ngaso linye. Kuliphutha ukuthi kungathiwa yimina omphenyayo, mina ngiyisisebenzi somnyango, uma kukhona uphenyo makungabuzwa mina makubuzwe umnyango,” kusho uNkk Hadebe.
Imizamo yokuthola uMnu Cibane iphunzile ngoba ucingo lwakhe belungangeni.
thandeka.ngobese@ilanganews. co.za