Uhlawulisiwe ocele isinene esihlotsheni
Usebenzise ukuhlupheka kwaso esethembisa umsebenzi
UHLAWULISWE imbuzi ehamba ngamasondo owesilisa osekhulile waseNkomeni eNgwavuma, enyakatho yeKwaZulu-Natal ocele ucansi esihlotsheni sakhe, esebenzisa ukuxakeka kwaso ngakwezomnotho.
UMnu Duladula Msweli (59), oyikhansela lenduna yesigodi iNtabayengwe khona eNkomeni, uMnu Joseph Sithole, uhlawuliselwe ukuholela ehlathini indodakazi yomfowabo, enguNkz Khululiwe Mafuleka (29) angasebenzisi isibongo esifanayo naye futhi kabazalwa ngunina oyedwa.
Ngokuthola kweLANGA, uMnu Msweli ubefuna ukuyozicelela ucansi kuNkz Mafuleka ngethemba lokuthi uzobonga ngokumfaka emsebenzini wokuphakamisa iduku elilawula ukuhamba nokuma kwezimoto njengoba kwakhiwa umgwaqo u-D1842 osuka eNtabayengwe uze uyofinyelela eManyiseni kwesakwaMathenjwa.
Leli phephandaba liyizwile inkulumo eqoshiwe lapho uMnu Msweli enxusa uNkz Mafuleka ukuba ehlise isikhindi sakhe sangaphansi ukuze bezothokozisana ngocansi, okuyinto abethi bazohlala beyenza kuleli hlathi abebekulona.
Kuzwakala ecela ukujola noNkz Mafuleka okuyinto abethi kufanele iphethe ngokuba amlobole.
Kule nkulumo ukhala ngokuthi yena akakwazi ukuhlala nesalukazi (inkosikazi yakhe) esingasakwazi nokuwasha izimpahla zakhe.
Iyaqhubeka le nkulumo kuzwakala nezinto okungelula ukuzibhalela umphakathi.
UMnu Msweli uzwakala ethi: “Ungesabi lutho mntanami ngifuna ukulala nawe ukuze ungikhumbule uma sengingekho, nami ngizokukhumbula,” kusho yena.
UNkz Mafuleka utshele ILANGA ukuthi ubone kungcono ukuba aqoqe ubufakazi ngoba kunemibiko ethi baningi abasebenza ngoba bevume ukugilwa imikhuba yingxenye yobuholi bomdabu endaweni, okuthiwa isebenzisa amandla ewanikwe yizinkampani eziyokwenza imisebenzi endaweni ukuba kube yibona abathumela abantu lapho kusetshenzizwa khona.
“Ngibe nokusola uma ethi ufuna inombolo yocingo lwami. Uqale wathi mangihlangane naye ehlathini kukhona into afuna siyixoxe.
"Ngiqale ukushaya amakhala uma esethi ufuna ukujola nami, ngaleso sikhathi ubengithintathinta elimisa ngesihloko elokuthi ufuna ukujola nokulala nami ukuze ngimkhumbule,” kusho uNkz Mafuleka obethukuthele egane unwabu.
NgoLwesine ekuseni kuhlangane imindeni yabo bobabili kwaphunywa nesinqumo sokuba uMnu Msweli ahlawuliswe imbuzi ehamba ngamasondo maqede wabekwa icala lokufuna isinene sesihlobo.
Ethintwa ukuba aziphawulele ngalolu daba uMnu Msweli, uthe kuyiqiniso ukuthi ubefuna isinene kodwa inhloso yakhe enkulu wukuthi ukujola kwabo kuphethe ngokuba uNkz Mafuleka abe yindlu yakhe yokugugela.
“Mina ngisifunile isinene, nginqabile ukukhokha inkomo yokuqeda ubuhlobo ngoba intombi kayingiqomanga. Mina ngifuna umakoti omncane, kangishongo ukuthi ngizomqasha emgwaqweni kodwa ngithe ngizombhekela.
"Ukukhokha kwami imbuzi kakungivimbi ukuba ngiqhubeke nokweshela intombi,” kusho lo mlisa.
UMnu Phathenhloko Mafuleka, oyilunga lomndeni, usigxekile lesi senzo. Uthe kubi okwenziwa nguMnu Msweli ngoba usebenzisa budlabha amandla awanikezwe wubukhosi ukuba ahole isizwe ngokwethembeka.
“Ngimhlawulise imbuzi ngoba mina naye siyazalana. Ungumfowethu. Ngeke mina ngisuke kwami ngiyoqomisa ezinganeni zakhe. Impela ngiyazidinga izinkomo kodwa hhayi ezesihlobo.
"Kubi lokhu akwenzayo ngoba uzehlisa isithunzi,” kusho uMnu Mafuleka.
Elinye ilunga lomndeni wakwaMsweli, elingathandanga ukuba kudalulwe igama lalo, lithe kunzima ngisho nasemndenini ngenxa yalesi senzo.
Lithi sekuqubuke nezindaba ezindala. “Inkinga sekukapakela nezinye izinduna zezigodi ezithintekayo ekwenzeni imikhuba emibi kubantu besifazane maqede bangaqashwa.
"Kubuhlungu okwenziwa yilaba baholi ngoba behlisa isithunzi sobukhosi besizwe. Kuyaye kwale noma kumenyezelwe esidlangalaleni kodwa izinduna zithi kuzoqasha zona. Sikubhekile ukuba kungabikhona ofayo ngoba siyezwa ukuthi enye yezinduna ezithintekayo ihamba yenza izinsongo ngale nkulumo eqoshiwe,” kusho leli lunga. UMnu Sithole ubhokele ILANGA wathi lolu daba kalufanele ukubhalwa kodwa yathi lingabhala elikuthandayo. “Lolo daba ngiyalwazi kodwa kangizimisele ngokuphawula ngalo, hamba uyobhala okuthandayo, kusho yena egaklaza ucingo okuthe uma ephinda eshayelwa wangaluphendula ucingo.