Unenge abantu uWinnie Khumalo emcimbini weDstv MVC Awards
BASIGXEKE njengendlela eshibhile yokuheha abezindaba isenzo sikaWinnie Khumalo ( osesithombeni) sokungena emcimbini wezindondo iDstv Mzansi Viewers Choice Awards eqhutshwa ngesihlalo sabangakwazi ukuzihambela
Lo mcimbi ubuse Sandton Convention Centre, eGoli, ngoMgqibelo ebusuku.
UWinnie ungene eqhutshwa ngalesi sihlalo watshela abantu ukuthi ulimele ngesikhathi bembuza ethatha izithombe emcimbini.
Kuthe sekufanele angene esiteji kwajika izinto esedansa kwabonakala ukuthi akanalutho nokwenze abantu bakhombisa okukhulu ukunengeka.
Esixukwini bekukhona abakhonondayo bethi lesi senzo sakhe sikhombisa ukungahloniphi abantu abakhubazekile noma abangakwazi ukuhamba.
Lo mcimbi ubalwa neminye yemicimbi esezingeni eliphezulu njengoba ubuhlanganise cishe bonke osaziwayo eNingizimu Afrika.
UThembisa Mdoda oseshiya ohlelweni i-Our Perfect Wedding uhlabane ngezindondo ezimbilli. Eyokuqala bekungeyokuba ngumethuli ovelele, eyesibili kwaba ngeyokuvotelwa kakhulu emkhakheni wakhe.
UThembisa exoxa nabezindaba uthe njengoba liphela ithuba lakhe kwi-OPW usezogxila kwezamafilimu nezeshashalazi.
Uthe ngeke akhohlwe yithuba alinikezwe yiConnect Tv.
UVatiswa Ndara ungomunye wabalingisi abazuze izindondo njengoba ethole eyokuba ngumlingisi ovelele kanti ungene esiteji esehamba ngezinyawo ekhala ngokuthi izinyawo ziyavutha, ngeke akwazi ukuzenza into angeyona.
Yize lo mcimbi ubungowokuqala ukuba khona kodwa abantu abebewuhambele bakhombise ukuwuthakasela kakhulu.
USummary unqobe emkhakheni wosomahlaya ehlula uSkhumba Hlophe noCeleste Ntuli kanti kakuphelanga sikhathi abantu bangena ezinkundleni zokuxhumana beveza ukungenami kukaSkhumba ngokunganqobi indondo.
UNondumiso Mabhece ongumphathi omkhulu wezokuxhumana kuMzansi Magic uthe njengoba libe likhulu isasasa kulo mcimbi nakanjani ngonyaka olandelayo kuzobe kushubile kakhulu.