IVALWE NGEGIYA ELIPHEZULU INYANGA YABESIFAZANE
BAYIVALE ngegiya eliphezulu inyanga yabo abesifazane njengoba bebephume ngobuningi babo emcimbini kaDudu Khoza woKhozi FM obuwenzelwe e-Unique Lifestyle okuyindawo kaSma noCalvin Mathibeli obubizwa nge-Dinner with Dudu.
Injabulo nokuzethemba kubantu besifazane ubuyibona ufika nje endaweni obekwenzelwe kuyo umcimbi. Lokhu kufakazelwe nayizikhulumi zosuku ebezikhuluma kodwa zingakushiyi ngaphandle ukuzethemba komuntu wesifazane.
Umcimbi uqale ngehora lesi7pm kanti uhlelo beluphethwe wuJacinta Ngobese, umnini wendawo uSma nguye owamukele izethameli.
Kube sekungena uDudu Khoza obeluphethe ngesinono uhlelo, ebabaza uthando aluthola kwa- besifazane nokwesekwa akutholile ehlela lo mcimbi.
Kulo mcimbi bekuphushwa isiqubo esithi “DDD” okumele uDaring, Devotion noDetermined okuchazwe ngokuthi abesifazane mabavuke bazithatha bangakhathali.
Umphathi wohlelo ubethi uma esukumisa isikhulumi aqale achaze ngomlando waso onothile njengoba izikhulumi eziningi bekungabantu asebezakhele igama elihle emphakathini nasezindaweni abasebenza kuzona.
Phakathi kwabantu ebebeyizikhulumi singabala uDkt Nonhlanhla Mkhize ongumqondisi ehhovisi likandunankulu waKwaZulu Natal, uNomusa DubeNcube onguNgqongqoshe eMnyangweni wezokuBusa ngokuBambisana nezoMdabu noLindiwe Rakharebe oyisikhulu esengamele eNkosi Albert Luthuli Convention Centre (ICC) ukubala nje abambalwa.
Phakathi kwabantu ebebekhona singabala uBrenda Mhlongo olingisa kwiGenerations, uSindy Bandala ongunina kaBlack Coffee, uQueen Dlamini ongunina kaMinnie Dlamini.