Basola uhulumeni kushona abangaboni
Lsikhungo siseduze nomgwaqo
SEKUQUBUKE ingebhe kubantu abangaboni abahlala e-Ilovu Development Centre, eLovu, eningizimu yeTheku emuva kokuba kushone ababili beshayiswa yimoto encane ngoLwesihlanu ekuseni.
Le ngozi iholele ekubeni uMnu Sipho Msimang omele inhlangano yomphakathi, iThokoza Organisation, agxeke uhulumeni ngoba ethi sekunesikhathi eside utshelwa ngoku-ngaphephi kwale ndawo obeke kuyona abangaboni.
Uthi bakhishwe ebhilidini elisedolobheni eThekwini eminyakeni emibili edlule ngoba kuthiwa liyalungiswa. Utshele ILANGA ukuthi bekuvele kungekhona ukucabangela abantu abakhubazekile ukuba bathathwe bayobekwa endaweni eseduze nomgwaqo omkhulu, umqwaqo ovele uyingozi kwabangakhubazekile.
“Laba bantu sebenesikhathi esingangonyaka behlala kule ndawo, kuba buhlungu uma ubabona bezama ukweqa umgwaqo ngoba ngisho abashayeli abaningi kabazi ukuthi kunabantu abangaboni kule ndawo.
"Ngabe kungcono ukuba kukhona noma yinto ekhombisayo ukuthi kukhona abangaboni kule ndawo. Mina nje ngisola wona uhulumeni ngempilo yalaba bantu abadlule emhlabeni ngoba yiwona obayekelelile,” kusho yena.
Kakuyena uMnu Msimang kuphela obezizwa ngalolu hlobo njengoba ekhona namanye amalunga omphakathi abevumelana naye ethi asola uhulumeni ngokudlula emhlabeni kwalaba ababili. “Lo mqwaqo mubi kakhulu, nathi nje sithwala kanzima uma izingane kumele zeqe ziye esikoleni ngoba sesaba ukuthi zizolimala.
"Uma unezingane ezincane kumele uyoziwelisa umgwaqo, uzihlangabeze uma sezibuya esikoleni ngoba kuphinde kuhambe nezimoto ezinkulu la," kusho omunye onqabile negama lakhe. Ngokuthola kwaleli phephandaba, abashonile bebezama ukweqa ukuze bayothola izinto zokugibela kanti bazoshayiswa yile moto eqede yaphaphalaza yaphuma emgwaqweni umshayeli walimala.
Umphathi wesikhungo, uMnu Sfiso Madolo, wenqabile ukukhuluma neLANGA wathi yonke imininingwane ngesigameko izokhishwa ngabavumelekile ukukhuluma nabezindaba.
Imizamo yokuthola uvo loMnyango wezokuThuthukiswa koMphakathi KwaZulu-Natal iphunzile njengoba uMnu Vukani Mbhele ethembise ukubuyela kuleli phephandaba kwaze kwashaya isikhathi sokuloba engabuyelanga - uke wathintwa futhi kodwa lutho ukulubamba ucingo lwakhe.
Okhulumela amaphoyisa KwaZulu-Natal, uLt Colonel Thulani Zwane, uthi kakukaboshwa muntu, kusaphenywa.