UYABALISA UMNDENI WOSHONILE
IYAQAQAMBA inhliziyo emndenini wakwaNgcobo eMhlabashana, eHighflats, eningizimu yeKwaZulu-Natal emuva kokuba ilunga lawo lishone engozini yemoto egingqike umshayeli wayo wabe esecela empunzini.
Umndeni kaNkz Zoleka Ngcobo (18), uthi ufuna izimpendulo kumshayeli wemoto njengoba sekuqubuke izinsolo zokuthi ubeshayela edle amponjwana. Lesi sigameko senzeke ngoMgqibelo womhla zili-19 kwephezulu ngesikhathi umufi nabehamba nabo, bephuma emembesweni obungempelasonto KwaNdengezi, entshonalanga yeTheku.
Kubikwa ukuthi kulo mcimbi bekuphuzwa notshwala kanti umshayeli kuthiwa ubehabulile, okusolwa ukuthi yingakho ebalekile endaweni yesigameko. Kule ngozi kushone ababili, abanye balimala kanzima. Umthombo weLANGA ulipotshozele ukuthi umshayeli ubaleke amaphoyisa esekhona.
Uthi ngelinye lamaphoyisa elimcebise ukucela empunzini njengoba ebedle amponjwana - kuthiwa uhlobene nalo. Uthi lezi zinsolo zidalwa wukuthi kunemibuzo yokuthi ubaleke kanjani umshayeli esefikile amaphoyisa endaweni yesigameko. “Kushiya imibuzo eminingi ukubaleka kwakhe ngoba ungumuntu
wendawo futhi nabehamba nabo ngabasendaweni. Kuyaxaka ukuthi kungani ebalekile uma ubengenalutho,” kusho umthombo.
Unina kaZoleka, uNkz Hlengiwe Ngcobo, uthi namanje kakuvumi ukuba akwamukele ukushona kwendodakazi yakhe. Uthi ugcine ukuyibona isaphila ngoMgqibelo ngaphambi kokuba iye kulo mcimbi obuKwaNdengezi. Uthi okumphatha kabi kakhulu wukuthi umshayeli wemoto ubalekile emuva kokugingqa imoto nokwenza asole ukuthi ziyiqiniso lezi zinsolo zokuthi naye ubephuzile.
"NgoMgqibelo sizwe sesibizwa kuthiwa masiphuthume sekugingqike imoto ebihambe izingane. Sithe uma sifika lapho kwenzeke khona ingozi, bekunababili asebeshonile, kubalwa nendodakazi yami. Indlela ebilimele ngayo, ubuchopho bebusakazeke phansi, ikhanda liqhumile. Ubengasabonwa umshayeli wemoto.
"Lokhu kusiphathe kabi ngoba besilindele ukuba asichazele ukuthi kwenzekeni," kusho uNkz Ngcobo. Uthi umshayeli wemoto uyile kwaNgcobo nomndeni wakhe ngoLwesibili olwedlule eyoxolisa ngakwenzile kodwa kunzima kubona ukwamukela ngenxa yokubaleka kwakhe.
Utshele ILANGA ukuthi kakuvumi akholwe wukuthi lokhu okwenzekile kube yiphutha ngenxa yokuthi umshayeli ubalekile wangasiza ebona abantu belimele kwaze kwadlula izinsuku engaziwa ukuthi ukuziphi nezinkalo. “Ukuba lokhu akushoyo kuyiqiniso (ukuxolisa), bekumele angabaleki ahlale ukuze amaphoyisa amfuthise kutholakale ukuthi ubengaphuzile yini.
"Uma bekuyiphutha, ubezohlala asize ngesikhathi kutakulwa abalimele kodwa wakhetha ukubaleka. Konke lokhu kwenza sibe nemibuzo engaphenduleki. Abebesemotweni abasindile bayasho ukuthi naye ubephuzile umshayeli. Kubuhlungu ukwazi ukuthi ingane yami ngeke ngiphinde ngiyibone, umuntu owenze ingozi yena ukhona akaboshiwe," kusho yena.
Okhulumela amaphoyisa KwaZulu-Natal, uLt Col Thulani Zwane, uthi amaphoyisa aseHighflats aphenya icala lokubulala ngokungenhloso ngokushona kwababili kugingqika imoto, kuboshwe umsolwa wavela eNkantolo yeMantshi yaseHighflats ngoMsombuluko odlule.