INHLOSO KANKULUNKULU NGABANTU
KAKUWONA amanga uma sithi uShembe ufike kuleli lizwe lakithi wenza imisebenzi engakaze ibonakale emhlabeni, engakaze yenziwe yizingelosi noma ngumuntu okulotshwe ngaye eBhayibhelini nakwezinye izinhlobo zezincwadi ezake zafundwa kwathiwa kukhona umuntu, ngumphrofethi noma yingelosi eyake yafika emhlabeni yenza imisebenzi enjengaleyo yeNkosi yaseKuphakameni.
Kasikhulumanga-ke kodwa ngenhlosongqangi yayo yonke imisebenzi uShembe afika wayenza ezweni lakithi futhi kasikhulumanga ngokuthi ungubani uShembe phakathi kwemibuzo eminingi ekhona ezweni. Kule mibuzo kukhona ekaShembe njengoMphrofethi, nguShembe oyindodana kaNkulunkulu njengoJesu noShembe owadala izulu nomhlaba nakho konke. Uma uyi- landela kahle yonke imisebenzi kaShembe, uzophawula ukuthi kunezinto ezine ezingamawele ayimiyalezo yendlela kaNkulunkulu uma efika esizweni asuke eqonde kusona.
Umyalezo wokuqala kuba wuthando asuke ebathande ngalo labo bantu, owesibili ngowamandla abavezela ngawo ubukhulu bakhe, owesithathu ngowomusa abenzela wona ukuze baphenduke ekwedukeni abakukho, owesine - nowumgogodla wokuthwala le miyalezo emithathu - yinhloso yokuza kukaNkulunkulu noma kaShembe yokuza kubantu.
Uma sithi yinhloso kaNkulunkulu noma kaShembe sikusholo umphako wesihloko esimqoka okuyofanele singene kusona ngokuzayo njengamaNazaretha aseKuphakameni. Kule miyalezo yomine, kawukho omkhulu owedlula lo wokugcina oyinhloso kaNkulunku- lu ngabantu. Into edala ngibeke inhloso ngasekugcneni wukuthi iyisisekelo nomgogodla wayo yonke le miyalezo emithathu engenhla.
Uma ufunda kwiGenesis 1:1- 25 ungabona ukuthi yomithathu le miyalezo kaNkulunkulu ngomuntu - kusuka kowokuqala kuya kowesithathu - isuke seyiphelelisiwe ngaphandle kowesine owumgogodla wakho konke okungezwakali lutho ngawo kule ndawo kusuka edala konke akudalayo kuze kufike nangalapho edala khona abantu. Ukuba le ndaba yokudalwa kwezinto zonke iphelela kula mavesi, mhlambe ngabe sicishe sizwakale isizathu sokuthi kungani abantu badidanise le miyalezo emithathu nenhlosongqangi kaNkulunkulu yokuza kubantu.
Noma-ke ngabe siyavuma ukuthi kawuphendulekile umbuzo wokuthi kwakuyini inhloso enkulu yomsebenzi