Inkinga yeququ
NGESIZULU kuthiwa iqaqa kalizizwa ukunuka nxa kubhekiswe kumuntu ongaboni noma ongafuni ukuvuma uma enze iphutha. Kasazi-ke ukuthi kuthiwani uma umuntu enenkinga yengxenye yomzimba enuka kabi, okungaba wumlomo, amakhwapha, yizinyawo noma nje wonke umzimba.
Kunabantu abaphelezelwa yiphunga elinamandla kangangoba ngisho sebesukile lapho kade bekhona, kusala kuzwakala ukuthi bake baba khona. Inqaba lapho ikhona wukuthi umuntu onjalo uyaba nathandana naye kepha umahluko ungabikhona.
Kungenzeka ukuthi kusuke sekuyisibindi nokubekezela kowesifazane ozwana nomuntu onjalo okwenza onenkinga angazazi ukuthi unayo futhi idinga ukuba ayisukumele. Kumuntu wesilisa iphunga lomzimba libizwa ngeququ kanti kowesifazane libizwa ngomsanka. Namuhla sibheka izaba ongazenza usekhaya uma unale nkinga. Lokhu ngeke kwenzeke nxa onale nkinga engazazi kumbe engatshelwa ukuthi unayo. 1. BAKING SODA
Sike sakhuluma kule ngosi phambilini ngosizo lwe- baking soda (bicarbonate soda). Kuthiwa-ke iyakwazi ukumunca umjuluko bese ngaleyo ndlela kunciphe iphunga lomzimba. Kuthiwa ibulala amagciwane ilingise amakha afakwa emakhwa
pheni. Xuba ithispuni elilodwa le- baking soda nelejusi kalamula, gcoba
emakhwapheni nakwezinye izingxenye zomzimba ezijuluka kakhulu. Kuyeke imizuzwana bese ukuhlambulula ngamanzi kodwa ungahlikihli. Okulandela lapho wukugeza okujwayelekile. Lokhu kwenze nsuku zonke kuze kube ngamasonto ambalwa. Okunye okwehlukile ongakwenza wukuxuba ngamanzi i- baking soda ne- cornstarch kulingane bese ukugcoba emakhwapheni omile ukuze uvimbele ukujuluka nephunga elibi.
I-Apple Cider Vinegar iyisithako esinamandla sokulwa ne- bacteria. Iyasiza futhi ekuqedeni iphunga elibi lomzimba ngokwenza kube nesilinganiso esifanele se-pH esikhumbeni.
Cwilisa ibhola likavolo kwi-Apple Cider Vinegar bese uhlikihla amakhwapha. Linda kudlule imizuzu emibili noma emithathu bese uyageza. Yenza njalo kabili ngosuku, ekuseni nangaphambi kokulala uqhubeke njalo uze uwubone umehluko.
Uma uthanda vele uthele inkomishi ye-Apple Cider Vinegar emanzini antukuntuku. Ngena uhlale kulawo manzi kuze kuphele imizuzu eli-10 kanye ngosuku. Ungathela amathispuni amabili e-Apple Cider Vinegar noju kancane engilazini yamanzi afudumele. Phuza lokhu kathathu ngosuku njalo ngaphambi kokudla.
3. IJUSI KALAMULA Ijusi kalamula iyasiza kakhulu ekwelapheni iphunga elibi lomzimba. Ubumuncu bukalamula buyasiza ukwehlisa isilinganiso se-pH. Lokho kwenza kungabi lula ukuba i- bacteria edala iphunga elibi iphile.
Sika isithelo sikalamula esisha sibe yizingcezu ezimbili. Khuhla ucezu emakhwapheni. Qiniseka ukuthi amanzi aso ayangena esikhunjeni sakho. Linda kome bese ugeza. Lokhu kwenze kanye ngosuku nsukuzonke lize liphele iphunga elibi.
Uma unesikhumba esizwelayo, ungawuhlambulula ulamula lo ngamanzi awuhhafu wenkomishi bese ugcoba amakhwapha usebenzisa igengqele likavolo. Yeka kuze kuphele imizuzu eli-10 bese uyageza. Lokhu kwenze kanye njalo ngosuku uze ubone umehluko.