YEKANI UKUZENZA OSIYAZI, NIZOPHOXEKA
PHELA ukuthi sebeyangifunga ngakithi KwaDlangezwa kakusho ukuthi inkaba yami sengayimba ngayoyitshala emathuneni ase-17 eMlazi, eningizimu yeTheku.
Ngeledlule ngivakashele ngakithi ngesikhathi iMeya yaseMhlathuze yethulela abantu bakhona izinto esezenziwe wumasipala nezinye osazozenza. Lo mcimbi ubungakithi impela - KwaDlangezwa, okuyiyona yodwa indawo yasemakhaya engiyaziyo enenyuvesi, i-University of Chunuland… ngiyadlala i-University of Zululand, ngingaze ngishaywe phela lezi zibongo eziqala ngoZ ziyashesha ukwenyukelwa yi- diabetes.
Kunezinto eziningi ezinhle ngalowaya masipala, ngizobala ezintathu nje kuphela. Eyokuqala wukuthi imeya yakhona izalwa ngumemu wami, uMam Mhlongo ( God bless her soul), okwesibili imeya kakuwona umdodovu nje wekhehla osuhlalele impesheni esikhundleni noma obalekela idanyane eyazibonelwa ngolova, okwesithathu wukuthi ziyaphenduka eMhlathuze. Ngiye ngizwe kuthiwa ukuhamba wukubona… cha nokuhlala ekhaya nje wukubona.
Kulo mcimbi obungakithi, umphathi wohlelo ushaye i-masterpiece ethi uMathewu wagibela esihlahleni ngoba efuna ukubona uJesu, kwasho ukuthi ezangakithi iBhayibheli zilazi njengesidakwa sendawo ongeke usitshele ngamagama eziqatha endaweni.
Zivele zamtshela ukuthi cha nguZakewu. Le nto-ke ingifundise isifundo sokuthi kubalulekile ukuthi noma ufuna ukuba abantu bakujabulele uma uphambi kwabo, gwema ukukhuluma uze udlule esitolo othunywe kusona ngoba uzokhuluma nongazazi.
Kungcono khona nje ukuthi abaphathi bezinhlelo bagcine ngokulokhu bememeza lezi zinto zabo abazimemezayo o-tholukuthi umithiswe yiphara; ongazi ukuthi tholukuthi kokwenzani.
Abantu bayathanda ukukhuluma bagqagqamuke kuhle kwamabhasi aseNgwavuma esuka eMpangeni. Sengiyabona ukuthi kungani singenabo abantu abaningi abamnyama abangabasunguli bezinto - siyathanda ukwenza izinto size sidlule la kufanele sifike khona, senze nokuphambene.
Ubungethuka isimanga kuthiwa umuntu uphika ingane yakhe, ivuke inj’ e- blue intombazane ithi makuyokwenziwa iDNA test. Njengoba eyabelungu imishini iye iveze amaphesenti uma iqhathanisa ukuthi abantu bayazalana noma cha, ubungabona isimanga ukuba le mishini yakhiwa yithina. DNA Report: Done at Mhlongo Laboratory with Gumede DNA Testing Machine, Est 2007.
Report: Lo mbiko umayelana nolibofuze lukaLotia Kubheka ophikwa nguMbhekeni Ngubane. ULotia uzalwa nguMbhekeni kaSibhaha, kaMqethuka, kaVezamaqili, kaBhembuluka owayeyibutho leSilo uShaka, uFasimba.
Unina kaLotia uzalwa nguJotham, kaSazela kaMshayazaklewule. Ekugcineni ubhale umshini - ngoba kwawona usudidekile ngale information oyikhiphayo - error. Asayine umhloli aze abhale ukuthi “Nko! umshini ushaye esikhonkosini”.
Siprinte khona kunjalo simnikeze untombazane iDNA test. Alithathe uMbhekeni iriphoti lelo aliyise kwaMkhize Laboratory - for a second opinion - liphume libhale u-0.047 (km/h) i- speed seCornu aspersum, umnenke. Avele abone uMbomvu ukuthi ubanjiswa ijazi la. Siyathanda ukwenza izinto kuze kwedlulele.
Uboke ubone nje le genge esontayo, umuntu yonke into ayenzayo ungafunga ukuthi yimoto efakwe i- turbocharger! Kuyaculwa esontweni kushaywa o-do-remi-faso-lathi-do, yena uphuma yedwa usho ngo-# do-#re-#mi-#fa-#so-#la#thi-#do* ungaze ufunge ukuthi ufaka i- airtime, uyabhimba enjalo nje. Kuyathandazwa umemeza kubaleke amahlokohloko ezihlahleni, kushaywa izandla yena ubhonya iBhayibheli ungathi ubuza ukuthi lalithuleleni uGu- mede eba ngumfundisi yena ekhona… kodwa uma kunikelwa ukhipha usheleni. Nakwapolitiki ufica umuntu ongasebenzi osehambe isikimu se- rugby sezinyanga zimtshele ukuthi uthakathwa ngumakhelwane wakhe lo onamansense angangena irandi langezikhathi zobandlululo.
Abaholi bepolitiki baze baqambe amanga aluhlaza cwe bethi: “Awu madoda yinkunzi uJ-something, wabekwa ezulwini ukuba asihole. Bonke laba abamedelelayo, sizobagaxa amathayi sibashise njengoba sasenza ngezikhathi zobandululo.” Uvele ubone nje ukuthi le nto isihamba nokuloywa ngemithi yaseNigeria, edinga abefundisi abanamandla njengathi oRev, His Majesty, Adv, Prof, Dr, Pres Mkhekhelezi.
Usungaze wesabise ngokubulala abantu ngenxa yamadoda angakuphakeli! Umuntu ngisho ephethwe yisifo esibi sokuzalisa angondli, ungaze ufunge ukuthi uloyiwe. Akenqeni ukuzalisa amantombazane ayisi-8 endaweni kodwa angondli ngisho neyodwa kodwa ondle ovukayibambe - ababonwa nguMpharanyana wazishonela - laba abagcwala emajoyintini.
Indaba-ke wukuthi simandla ngasezintweni eziphambene nokulunga. Uma ungase uthi nje kumuntu wakithi makasize omakhelwane bakhe abantulayo abathengele igilosa kanye nje ezinyange- ni ezimbili ngoba yena udla izambane lika-R2, umuzwe ethi:
“Ini? Njengoba laba bantu bethakatha kanjena nje, ngizothini uma sebengithakatha ngalokhu kudla?” Bhatata! Masiyeke nje ukuthanda ukukhuluma ngezinto esingazazi, uma wenze i- thesis ngomaskandi, musa-ke ukuphapha uma usunikwa ukuba uphathe uhlelo sikuzwe usukhuluma ngoRica Roses udida abantu ngoba bazozitshela ukuthi yitiye elisha kanti uqonde umculi we- hip hop. Memeza nje ukhale ngeGcokama Elisha, iNdlamlenze, izinsizwa ezingamabhinca oKhathide “Thwalugodo” Ngobe etc.
Qinisa kulokhu okwazi kakhulu, lokhu ongakwazi kuyekele abakwaziyo, ungafuni ukuzenza uNontokozo of all Kitchens la ngoba uzozithela phezu kwabantu abafana nalaba abebesemcimbini kaMasipala waseMhlathuze, uthi uyaqina utshela abantu ukuthi uNursultan Nazarbayev ngu- president waseRussia - bavele bamemeze njengathi sisafunda ufestiya eQambokwethu Primary School sifunda o-A,E,I,O U - kodwa babengama- small letter - bathi:
“Unamanga, ngumengameli waseKhazakstan.” Uyobe usulokhu ufutha izihlathi la uhlinela abantu uthi bayakuphoxa kanti nguwena oziphoxayo. Hikhensile ngopfu ma-Afrika!