SEKUPHINDE KWASUKA LOKHO EXOLOBENI
ZISHAYA phansi ngonyawo izakhamizi zaseXolobeni, e-Eastern Cape, zithi uyokwakhiwa zifile umgwaqo omkhulukazi ozonqamula kule ndawo ohlongozwa wuMnyango wezokuThutha kuzwelonke.
Lo mgwaqo - ILANGA eselike labika ngentukuthelo yalo mphakathi mayelana nokwakhiwa kwawo - uzokwakhiwa yiN2 Wildcoast ozohlanganisa iTheku (KwaZulu-Natal), yiPort Elizabeth (e-Eastern Cape) neMpumalanga. Umnyango uveze ukuthi isiphasisiwe ibhajethi yokwakhiwa kwawo, uzodla u-R9 billion. Umsebenzi wokwakha, kuthiwa uqale kulo nyaka.
Ngokusho kokhulumela i-Amadiba Crisis Committee (ACC), okuyinhlangano ebhekelele abantu baseXolobeni - uNkz Nonhla Mbuthuma, lo mgwaqo kabafuni unqamule kule ndawo yabo enomhlaba onothile ngoba uzophazamisa ukudla abakutshalayo, uhlukanise nomphakathi wabo phakathi.
“Sifuna uhulumeni usizwe kahle, kasiphikisani nentuthuko kodwa sicela lo mgwaqo wawo uthi ukuwushenxisa kancane unganqamuli la emasimini ethu nasemizini yethu. Singabantu baseXolobeni siphila ngakho ukulima, lo mhlaba uhulumeni osufuna ukuwukhonka ngomgwaqo ufundisa izingane zethu.
"Sinodokotela, sinabameli nothisha abakhiqizwe yilo mhlaba. Kasiceli lutho nje kuhulumeni yingoba sondliwa yilo mhlaba. Ngeke uze uzwe kule ndawo yethu kuthiwa kushiswa amathayi, kuyabhikishwa ngoba umhlaba wethu uyasinakekela, uyasondla futhi usiphethe kahle kasidinge lutho kuhulumeni,” kusho uNkz Mbuthuma.
Ukhala nangokuthi uma izingane ziya esikoleni kuzodingeka ziwele umgwaqo owuthelawayeka zibe sengcupheni yokushayiswa yizimoto. “Kule ndawo sinemfuyo engalimala uma sekwakhiwa uthelawayeka ozonqamula lapha eduze kwemizi yabantu. Sicela nalezi zinti ezafakwa ngabakwaSanral bethi yilapho umgwaqo uzohamba khona, bazozisiphula ngoba ziyasiphazamisa. Bahlale bethi bakhuluma nenkosi bebe besho amanga,” kusho uNkz Mbuthuma.
Indodakazi yeNdlovukazi MaSobhuza Sigcau (eyinkosikazi yeNkosi Mpondombini Sigcau engasekho), uNkz Wezizwe Sigcau - okuyiyona ebambe ubukhosi njengoba unina esabambeke eSwaziland - ithe bona kabakaze bavumelane nomnyango wezokuthutha ukuba kwakhiwe umgwaqo kuleya ndawo.
Iqinisekisile ukuthi bewubukhosi ngeke basithathe isinqumo sokuba kuqhutshekwe noma kungaqhutshekwa kodwa ngabantu abazosho ukuthi kwenziweni. “Umhlaba kakusiwona owethu kodwa ngowabantu, thina njengamakhosi sisuke siwugcinele bona,” kusho uNkz Sigcau.
Umnyango wezokuthutha esitatimendeni osithumelile, uthe usuyiphasisile ibhajethi yokwakhiwa kwamabhuloho amabili. Odabeni lomgwaqo, umnyango uthi uzokhipha isitatimende esizoba nemininingwane egcwele ukuthi lolu hlelo luzoqala nini njengoba usazoba nomhlangano neSouth African National Roads Agency Limited (Sanral).
Kuzokhumbuleka ukuthi indawo yabantu baseXolobeni iyinyama njengoba kusenomsindo mayelana nemayini ye- titanium ehlongozwayo osekudlule imiphefumulo eminingi ngenxa yokuthi kukhona abayifunayo - kukhona abangayifuni.
Kasiceli lutho kuhulumeni ngoba sondliwa yiwona lo mhlaba, uyasinakekela.