Kukhonye abokufika kwiMandela Marathon
Umbango kwiSABC ne-1KZN TV
BABUYE belambatha abasubathi baseNingizimu Afrika kwiMandela Day Marathon enqotshwe nguTekletsion Tefera wase-Ethiopia.
Kulo mjaho obuyizolo ngeSonto uqala eManaye Hall, eMbali, wasongwa eMandela Capture Site, eHowick, kwabesifazane ubhedu ludliwe nguMamorolla Tjoka waseLesotho. Umjaho wanonyaka ubugubha iminyaka eyisi-6 wasungulwa. Ubuhlukaniswe izigaba eziyisi-7 njengoba uqale ngoMgqibelo ngeTrial Running, iMountain Biking, iCyling neFun Run. Izolo bese kugijinywa i-marathon ebisakazwa bukhoma kwiSABC2, i-21km ne-10km.
I-marathon inqotshwe nguTefera okhombisile ukuthi lukhulu alufunde nyakenye ngesikhathi ephuma isibili kulo mjaho obuvikelwa nguTsepang Ramonene waseLesotho ongabonakalanga nangokhalo kowanonyaka.
Izingqwele zalo mjaho zihlomule ngo-R100 000 ngokwehlukana kobulili kwazise zehlulekile ukuphula amarekhodi alo mjaho obekuzokwenza zizuze u-R50 000 ngaphezulu. Irekhodi labesilisa liphethwe nguThobani Chagwe (2:27) obebhekwe ngabomvu kodwa wahluleka ukungena nabokuqala abali-10. Elabesifazane liphethwe ngu-Irvette van Zyl (2:47) obengekho kulo mjaho njengoba elungiselela iCape Town City Marathon ezokuba ngomhla zili-17 kuMandulo (September).
UTefera uqophe isikhathi esingu-2:29 kwathi uTjoka wabeka u-2:49. USikhumbuzo Seme udlulwe nguKabede Dinke sekusele ngaphansi kwamakhilomitha ayisihlanu ukuba kufikwe eCapture Site. Abaningi bebezitshela ukuthi uSeme uzowuthatha lo mjaho kwazise uhambe phambili isikhathi eside. NoDinke ugcine edlulwe nguTefera oqengqeleze phambili waze wayoshaya intambo.
Lo mjaho udume ngokuba nentaba enzima engu-8km uma kusasukwa e-Edendale kuze kufike eSweetwaters. Kusephakathi nentaba uSeme usuke wahamba phambili waze wayidundubala.
Ngemuva kwalokho uvulele ngesikhulu isivinini ezihambela yedwa phambili, sekubhekwe ngaseMidmar Dam udlulwe nguDinke ongahlalanga isikhathi eside izintambo zathathwa nguTefera ehambisana noLyno Muchena oyingqwele yeZululand District Marathon ongene isibili kwathi uDinke wangena isithathu. USeme ojwayele ukungena nabokuqala abathathu, ulale isihlanu.
ULennox Mabaso okhulumela uMnyango wezokuBusa ngokuhlanganela nezoMdabu edidiyela lo mjaho, uzwakalise injabulo ngokuhamba kahle kwawo yize kuke kwaba nokungaboni ngaso linye phakathi kweSABC ne-1KZN TV kubangwa amalungelo okuwusakaza bukhoma.
“I-SABC igcine ivumelene ne1KZN TV kodwa engikuzwile wukuthi umjaho bebengeke bawusakaze kanyekanye. Kuqale iSABC kwase kuthatha i-1KZN TV,” kusho uMabaso ophethe ngokuthi iCap- ture Site sebeyithengile, bamatasatasa bayayilungisa ngenhloso yokuhlonipha uNelson Mandela njengoba aboshelwa khona. Uthi kuzokwakhiwa i- auditorium bese kuba nendawo lapho kuzobekwa khona imoto efana neyayihamba uMandela ngesikhathi eboshwa.
Isiyonke imiphumela yalo mjaho ihambe kanje, kwabesilisa: 1. Tekletsion Tefera 2:28:31, 2.Lyno Muchena 2:28:36, 3.Kabede Dinke 2:28:44, 4.Ramolefi Motsieloa 2:29:17, 5.Sikhumbuzo Seme 2:29:32, 6.Melly Kennedy 2:29:36, 7.Lutendo Mapoto 2:30:31, 8. Tsotang Maine 2:31:16, 9.Edward Mothibi 2:31:28, 10.Tarisai Rukadz 2:31:37.
Kwabesifazane: 1.Mamorolla Tjoka 2:48:49, 2.Salam Alebachew 2:49:00, 3.Loveness Madziva 2:58:57, 4.Chelitu Asefa 3:07:17, 5.Charne Bosman 3:09:02, 6.Kidist Tedla 3:10:41, 7.Makhosi Mhlongo 3:12:14, 8.Samukeliso Moyo 3:14:16, 9. Melanie van Rooyen 3:14:41, 10. Catherine Skhosana 3:18:40.
Kwi-21km, kwabesilisa: 1.Jobo Khatoane 1:05:20, 2.David Manya 1:05:20, 3.Joel Mmone 1:06:31, 4. Tebello Ramakongoana 1:06:45, 5.Ntsindiso Mphakathi 1:07:12.
Kwabesifazane: 1.Bertha Chikanga 1:18:29, 2.Rudo Mhonderwa 1:18:37, 3.Rutendo Nyahora 1:21:14, 4.Janie Grundling 1:22:02, 5.Ntebeleng Letsela 1:22:17.
Kwi-10km, kwabesilisa: 1. Precious Mashele 30:55, 2. Namakoe Nkhasi 31:01, 3.Tabanga Mosiako 31:12.
Kwabesifazane: 1.Jenet Dlamini 37:22, 2.Malineo Mahloko 38:15, 3. Liteboho Makhatseana 38:21.