USESIYEKILE ISIBHAKELA U-FLOYD MAYWEATHER
USEDELILE yisibhakela uFloyd “Money” Mayweather wase-United States of America (USA) emuva kokuba engqimuze kabuhlungu uConor McGregor waseRepublic of Ireland izolo ngeSonto ekuseni eLas Vegas, e-USA.
UMcGregor ulanyulelwe ngunompempe ngomzuliswano we-10 kucaca ukuthi ziyamutinyela izibhakela. Le mpi bekungesiyona eyesicoco kodwa bekungeyebhade lemali (money belt) elakhiwe ngesikhumba sengwenya, yigolide namadayimane nobunye nje ubukhazikhazi.
UMcGregor obekuyimpi yakhe yokuqala esibhakeleni esikhokhelayo, ubethishwa ukunqoba kwazise uyingqwele yeMixed Martial Art (MMA), okuwumdlalo lapho usebenzisa ngisho izinyawo ukulwa.
Nokho kumbhedele njengoba uMayweather ezibeke emlandweni wokunqoba izimpi ezingama-50 engakaze ehlulwe. Uphule irekhodi likaRocky Marciano olwe izimpi ezingama-49 engakaze ehlulwe.
UMayweather uthi usenele yisibhakela, usephuma unomphelo ngeke esabuyela eringini. “Sengizogxila ekuphromotheni izimpi, eyokulwa ngeke ngisakwazi. Le mpi bese kungeyokugcina ngingena eringini, sengenele manje yisona.
"Sesifikile isikhathi sokunika abanye ithuba. Noma ngingabekelwa malini ukuthi ngibuyele eringini ngeke ngisakwazi umzimba kawusavumi kanti nesivinini sezandla zami kasisafani nakuqala kwazise iminyaka isihambile.
“Bengazi ukuthi le mpi ngizoyinqoba kwazise uMcGregor akasiyena umuntu wesibhakela ubengeke alunge uma imizuliswano isihambile, bengivele ngikulindele ukuthi uzokhathala.
"Sengimshaya ubumbona nasemehlweni ukuthi usefuna ukusebenzisa izinyawo. Nokho akakwazanga ukwenza lokho ngenxa yokuthi imithetho kayimuvumeli,” kusho uMayweather obeshaya ibuya esibhakeleni emuva kokushiya eminyakeni emibili eyedlule.
UMcGregor uthi uzokhohlwa kancane yisibhakela abuyele kulokhu akwazi kangcono, iMMA.
“Isibhakela sinzima bengisithatha kancane, ukungena eringini ubhekane nenye indoda akuyona into elula. Ngendlela ebengiyijimele ngayo le mpi bengibona ngizoyinqoba kalula kodwa izinto zajika uma sengiseringini. Kuyakhathaza ukulwa. Ngivele ngakhathala ngawudaka kodwa-ke unondweba bekufanele angiyeke ngize ngiwe angangilamuleli,” kusho yena.