ISharks iqhubekile nokugingqa izinkunzi ekuhambeni
IQHUBEKILE nokugingqa izinkunzi zombhoxo waseNingizimu Afrika yize idlala ekuhambeni iCell C Sharks iguqisa iDHL Western Province ngo-21-20 koweCurrie Cup ngoMgqibelo kusihlwa eDHL Newlands Stadium, eCape Town. OShaka baye kulo mdlalo behambela phezulu emuva kokuhlula iGolden Lions ngo-47-31 eGoli emdlalweni odlule kanti kowandulela lowo baphoxe iVodacom Blue Bulls ngo-28-20 ePretoria. Emdlalweni neProvince, ziye ekhefini iSharks itabalasa ngemuva ngo-17-14.
Nokho ngesiwombe sesibili ibuye ngamandla njengoba ibilokhu ihleli endaweni egcwele yeProvince - okuyisigaba sama22m ukuya emugqeni we-try.
Kulamule i-try ka-Innocent “Inny” Hadebe (winger/flyhalf) ayicamelise emgqeni ngomzuzu wama-77 yalandelwa yi-conversion eshaywe ngobunono nguRhyno Smith (fullback) obuya ekulimaleni. Bekunzima kwiProvince ukunyakaza njengoba abadlali okubalwa kubona uSbusiso Nkosi (winger), uHadebe, uLouis Schreuder (Scrumhalf), u-Odwa Ndungane (winger) noMzamo “The Ram” Majola (loosehead prop) bebala ukhasha. Empeleni iSharks bekufanele ngabe inqobe kakhulu kulo mdlalo. Ngaphezu kwama-try amathathu aleli qembu - okube yi-penalty try, ekaFrancois Marais (hooker) nekaHadebe - uSchreuder noNdungane bacamelisile ama-try kodwa unompempe, uJaco Peyper nomsizi wakhe kamabonakude, uShaun Veldsman, bavumelana ngokuthi kube nokuphambana nomthetho okwenzekile emuva kokuba ecanyelisiwe. KwekaSchreuder uVeldsman ushaye udaka ethi lo mdlali uphunyukwe yibhola eseyofika emgqeni kodwa ekaNdungane kuvelile ukuthi liphunyukile. Umdlalo olandelayo weSharks uzokuba ngoMgqibelo eGrowthpoint Stadium, eThekwini neToyota Cheetahs.
Isiyonke imiphumela yeCurrie Cup imi kanje:- Cheetahs 30, Lions 24; Province 20, Sharks 21; Pumas 51, Bulls 15; Griquas 21, Pumas 27.
Kubuye inhlansi yethemba ngamaBhokobhoko ehlinzela i-Argentina esibayeni sayo ngoMgqibelo ebusuku e-Argentina, kuba wu-41-23 koweCastle Rugby Championships.
Elakuleli licamelise ama- try ayisihlanu kulo mdlalo elikhombise ukuzimisela okuyisimanga kuwona. UJean-Luc du Preez (flanker) ongene ngesiwombe sesibili, uthole i-try yakhe yokuqala edlalela iqembu lesizwe.