Kabaliphonsi ithawula nge-Europe
UMNIKAZI we-Ajax Cape Town u-Ari Efstathiou akaliphonsi ithawula ngokudayisa e-Europe umdlali wakhe omqoka okuvela ukuthi ufeyile izivivinyo zempilo.
I-Urban Warriors imemezele ngokusemthethweni ngeledlule ukuthi uRivaldo Coetzee odlala emuva kuyona uyahamba kule kilabhu usejoyine izingqwele zaseScotland, iGlasgow Celtic.
Nokho lishone elangoMgqibelo sekusabalele izindaba zokuthi lo mdlali ngeke esasayina nale kilabhu yase-Europe ngenxa yokuthi ithole ukuthi unokulimala okuzothatha isikhathi ukuthi kuphole.
Ukuvela kwalezi zindaba kuthiwa kakwehlanga kahle kulo mdlali kwazise ubesejabule ezitshela ukuthi uzothola ithuba lokudlala i-Uefa Champions League okuyiphupho lanoma yimuphi umdlali ukugijima kulo mqhudelwano. Kuthiwa ngaphandle kwalokho, lo mdlali ubesebalile ebona ukuthi izoshintsha impilo yakhe njengoba ubehola imali engatheni kwi-Ajax.
Kuthiwa ubetshela abangani bakhe ukuthi ufuna ukuthengela umndeni wakhe isithabathaba somuzi.
U-Efstathiou oyisikhulu esiphezulu kwi-Ajax, ophinde abe ngumnikazi wale kilabhu, uthi bazokulwela ukuthi lo mdlali abuyele phesheya.
“Sidumele ngokuthi uCoetzee akasezokuya ukuyodlala phesheya kodwa-ke ithawula kasiliphonsile, sizomelapha ngokweqophelo eliphezulu. Kungenzeka abuyele khona ngoMasingana (January) ngoba uphethwe yinkampani eseqophelweni eliphezulu,” kusho u-Efstathiou.
Imizamo yokuthola uMike Makaab wakwaProsport International okuyinkampani ephethe izindaba zalo mdlali iphunzile njengoba ucingo lwakhe belungangeni.
Kuvela ukuthi uMakaab ubesase-Europe njengoba ebeyolungisa udaba lukaCoetzee.