Mawayekwe amaNazaretha azinqumele ngamaphepha
SIZWA sidumala ukuthi usaqhubeka umkhankaso wokuba amalunga ebandla lama Nazaretha aseBuhleni ayeke ukuthenga amaphephandaba amabili esi Zulu okubalwa kuwona lona uqobo ILANGA. Leli phephandaba lizwe inkulumo eqoshiwe yomunye umfundisi ezinkundleni zokuxhumana lapho ebiza khona amaNazaretha ngabantu abangasile ngoba kabawulaleli umyalelo we Nkosi Mduduzi “uNyazilwezulu” Shembe wokuba la maphepha angathengwa.
Lo mfundisi uze athi uma unkulunkulu (UNYAZI) esethe into ingenziwa, kumele iyekwe. Kasisho-ke ukuthi amaNazaretha mawaphambane nemiyalelo yabaholi bawo kodwa esikuqaphelayo lapha wukuthi uma abefundisi bezoshusha abantu ukuba bangawathengi la maphephandaba, ngeke kulimale wona kuphela (ngezibalo zokuthengwa) kodwa kuzolimala namaNazaretha.
Kumele abaholi baleli bandla bakhumbule ukuthi iningi labantu ababaholayo, lidla imbuya ngothi izinkinga zalo eziningi zixazululwa yiwona la maphephandaba. Kuke kubhalwe kula maphephandaba ngezingqinamba eziye zibhekane nabafundi abangamalunga angamaNazaretha ezikoleni lapho behlukunyezwa, bechashwa ngezinhlamba kuze kuthiwe bakhonza umuntu. Ukubhala kwala maphephandaba kuye kunyakazise izikhulu zisukume - bethule du njalo abaholi bebandla ngoba izingane zifika emakhaya zibike.
Kokunye, kunezinkinga nje zasemphakathini eziye zibhekane namalunga omphakathi - kungakhethekile ukuthi ngamaNazaretha, amaKristu, amaHindu, amaSulumane njalo njalo - eziye zisukunyelwe ngoba sekubhalwe kula maphephandaba. Izingane ezingama Nazaretha - eziphuma emindenini edonsa kanzima - zithola imifundaze ngenxa yokubikwa kosizi lwazo kula maphephandaba, omama abondla izingane ngabodwana bengasebenzi, bathola usizo ngokuba la maphephandaba awuhlabe awulawule njalo njalo.
Lokhu-ke kwenza sicabange ukuthi umholi ongavimbela abantu ukuba bathole usizo ngokufunda la maphephandaba yingoba kusuke kukhona yena angafuni kubhalwe abona ukuthi kuzomeneka ubuze bakhe. Le nto ifana ncimishi nebiyenziwa ngosopolitiki abebekhankasela ukuba uMengameli Jacob Zuma athathe esokuhola i-African National Congress (ANC) ngowezi-2007 nangesikhathi engena ephuma ezinkantolo ngesikhathi kuyiwa okhethweni lukazwelonke ngowezi-2009.
UDkt Blade Nzimande uke watshela abantu abebegcwele eSugar Ray Xulu Stadium ngomunye unyaka ukuthi bangayithengi iCity Press - ngoba ibingabhalanga kahle ngoMnu Zuma. Kasikuboni-ke kusiza ukuba kuvinjwe abantu ukuba bathole ulwazi.
Uma uHendrik Verwoerd engavuka, kasingabazi ukuthi angajabula ukuzwa ukuthi kunomuntu ompisholo ogqugquzela ukuba abantu bakubo bangazi lutho ngezinye izinto ezenzeka eNingizimu Afrika - kakhulukazi lapho behlala khona. Amaphephandaba aqala ukubhala ngebandla lamaNa-zaretha lisaholwa nguPhrofethi Isaiah “Mqaliwendlela” Shembe, kwaba yiNkosi Galilee “iLanga” Shembe kodwa kasikhumbuli ngisho ezintshumayelweni zasezitimeleni kuthiwa laba baholi bake bathi mawangafundwa amaphephandaba, ingalalelwa imisakazo njengoba lo mfundisi ebesho ethi uKhozi lungalalelwa ngoba amaNazaretha “azolalela oMpanza (Mthandeni weNew Nazareth Baptist Church) ngoba nabo bathi bangoShembe”.
Ulwazi luyasiza ekubeni ukwazi nokuzivikela kwabakuhlaselayo ngamazwi. Uma-ke abantu betshelwa ukuba bakhethe amaphephandaba abazowafunda, sibona kukhona okuzobashiya.
Empeleni nje, iNkosi iLanga iyaziwa ngokugqugquzela amaNazaretha ukuba abe nolwazi, mabayekwe abantu bazinqumele ukuthi bayathanda yini ukuthenga amaphephandaba, bangaqanganiselwa uma bewathenga ngoba iqiniso elibuhlungu wukuthi okuni-ngi okusemaphephandabeni esiNgisi kakuthinti kakhulu imiphakathi empisholo emakhaya nasemalokishini.