ISAFA SEYISIVALILE ESIKANONKONYANE
SIVALWE ngoXolile Nkompela isikhala seNkosi Mwelo Nonkonyane ebingelinye lamasekela kaDanny Jordaan onguMengameli we-South African Football Association (Safa).
UNkompela unikwe lesi sikhundla emhlanganweni wesigungu sikazwelonke seSafa ngeledlule. UNonkonyane uzidonsele amanzi ngomsele ngokukhuluma ngekusasa likaGordon Igesund kwabezindaba engagunyaziwe.
Ngaleso sikhathi u-Igesund ubelolonga iBafana aqheliswe kuyona kwalandwa u-Ephraim “Shakes” Mashaba naye ochithwe ngonyaka odlule kwangena uStuart Baxter.
UNkompela uhola uphiko olubhekele ukusebenza kwezinhlaka zeSafa olubukeka ludida abaningi njengoba beshintshwa njalo abaholi balo. Ujutshwe kulolu phiko njengelungu lesigungu esiphezulu seSafa.
UNkompela ubalwa nosopolitiki abadumile e-Eastern Cape njengoba enguSihlalo we-African National Congress (ANC) esifundeni i-OR Tambo, futhi unguSomlomo we-OR Tambo District Municipality. Ngaphambi kokhetho lohulumeni bezindawo olube ngoNcwaba (August) nyakenye, uNkompela ubenguSomlomo eMhlontlo Local Municipality.
UNkompela usinde ngokulambisa edutshulwa ngemvula yezinhlamvu kwashona umqaphi wakhe oyedwa.
Kubukeka bengenisa osopolitiki ebuholini beSafa njengoba uJordaan ebeyiMeya yaseNelson Mandela Bay ekubeni uLucas Nhlapo ongelinye lamasekela akhe ebeyiMeya yaseBela-Bela. USmanga Mgenge obenguNobhala weSafa King Cetshwayo Region, uyiMeya yaseMfolozi.