Kuduma amakhanda emndenini oshonelwe yizingane ezine
Kuthiwa unina ubesebumnandini
USASHAQEKILE umndeni wakwaMbhele ePort Edward, ogwini oluseningizimu yeKwaZuluNatal, ngokubulawa kucwiywe izingane ezine zandawonye, ezishiywe zodwa ngunina (30) waya ebumnandini ngoLwesihlanu.
Isidumbu sikaBandile (12), esikaLwandile (10), esikaSphindile (7) nesikaLwandle (4) zitholakale izolo ngeSonto ekuseni. Ezintathu bezisendlini, esikaLwandile sisemnyango.
Isenzo sikanina walezi zingane - esingeke simdalule njengoba evulelwe icala lokungazinaki izingane zakhe - sokuhamba amalombo, ashiye izingane zodwa, kuthiwa yinto abeyijwayele ngezimpelasonto. Kuthiwa ubehamba ngoLwesihlanu aze abuye ngeSonto ntambama.
Ngokusho kukaninalume wezingane, uMnu Ben Mbhele (32), ngosuku ezibulawe ngalo izingane bezisele zodwa njengenjwayelo.
Uthi uLwandile ukwazile ukuphunyula waya kwamakhelwane eyobika ukuthi kunomalume obavalele endlini, ubabophe ngezintambo.
“Umakhelwane uthe makaphindele ayolanda izingubo zabo zokulala, abuye nalaba abanye bayolala kwakhe. Uhambe wangabe esabuya. Ngiyasola ukuthi ufike lo malume ndini esematasa ebabulala laba abanye ngaphakathi endlini ngoba uLwandile akatholakalanga endlini, umbulalele ngaphandle.
“Umakhelwane uthi ubelokhu ethi ziyabuya izingane ziyolala, wangabe esazilandela ukuyobheka ukuthi lo malume ozibophile ngubani futhi uzenzani. Ekuseni esethi uyozibheka, uzithele phezu kwalesi simanga.
“Okusizwisa ubuhlungu kakhulu wukuthi laba abebesendlini batholwe becwiywe izindlebe zangakwesokudla. Kasazi noma lo ozibulele uzibulele ngoba ubexabene nonina ematshwaleni ngoba efuna ukumzwisa ubuhlungu noma yisigangi esifuna ukwenza imithi ngalezi zingane,” kusho uMnu Mbhele.
Uthi yena uthintwe ngomakhelwane bethi makaphuthume ekhaya sekwenzeke inkinga njengoba engumuntu osebenzela kude. Uthi ufike sekugcwele amaphoyisa izingane zikadedewabo sezimboziwe, kukhombisa ukuthi zishonile zonke. Udadewabo uthi ugcine efikile kodwa wathathwa ngamaphoyisa ayomhloma imibuzo abuye amdedela.
“Kumanje kudadewethu kusaduma upotiyane, akakayikholwa le nto esehlele futhi akekho kwayilapha ekhaya usagcinwe ekhaya elikhulu. Isimo sakhe kasisihle, wethuke kakhulu.
“Kwayimina ngimdala ngingaka nje, kangikaze ngiyibone le nto yokulala kwezidumbu eziningi kanjena emzini owodwa ngesikhathi esisodwa. “Sonke sisangene, sidinga nokwelulekwa ngokwengqondo. Bese sithembele kuzona lezi zingane - njengoba bezihlakaniphile - ukuthi zizokhula ziyishintshe impilo lapha ekhaya. Manje njengoba sezihambe zonke, simosheke saphela.
“Sashonelwa nangabazali sisebancane bese kusele mina, udadewethu omdala osebenza emajalidini naye-ke lo omncane ongunina walezi zingane,” kusho uMnu Mbhele.
Okhulumela amaphoyisa KwaZuluNatal, uKpt Nqobile Gwala, uthe kuvulwe idokodo lokubulawa kwezingane ezine, kwavulwa nelokushiya izingane ezincane zingagadwe wumuntu - elibhekene nonina wezingane. Uthi kuwona wonke la macala akekho osaboshiwe njengoba amaphoyisa esaqoqa ubufakazi.