UYAVEVA UMNDENI WENGANE EGAYWE NGEMOTO
ZISAQAQAMBA izinhliziyo emndenini wakwaSibiya, KwaMbobha, eVryhead, enyakatho yeKwaZu-Natal ngesenzo somnikazi wepulazi oshayise wabulala ingane yawo maqede wabaleka ngeledlule.
Umndeni kaSkhululo Mthembu (5) ( osesithombeni), uthi namanje kawusikholwa isihluku esenziwe ngumsolwa egaya le ngane ngemoto maqede wakhala amaphepha endaweni yesigameko.
Okucasula kakhulu lo mndeni wukuthi umsolwa uyaziwa, uze wabanjwa ngelanga elilandelayo kodwa wangaboshwa. Kuthiwa ucele induna yendawo ukuba ihambise u-R3 500 wesinxephezelo - lo mndeni osithatha njengokweyisa.
Umndeni uthi okuwulahlisa ngithemba ukuthi ubulungiswa buzokwenziwa, wukuthi umsolwa akazange aboshwe yize amaphoyisa emtholile.
Uthi ngisho umphenyi wecala akazihluphi ngokuwazisa ngokuqhubekayo njengoba ungenayo ngisho inombolo yecala.
"Kuyimanje leyo mali ikhona kasizange siyisebenzise ngoba sifuna aboshwe, abhekane nengalo yomthetho ngento ayenzile. Zibuhlungu izinhliziyo lapha ekhaya ngokushona kwengane ngale ndlela. Okomphenyi wecalake, ngisho sithinta ngocingo kakukho asitshela khona, kangangoba ngisho inombolo yecala kasinayo, kasazi noma umsolwa uvelile yini enkantolo noma icala liphelile,” kusho uNkz Fisani Sibiya ongu- yisekazi kaSkhululo.
Uthi bafuna umsolwa abhekane nengalo yomthetho.
Uthi ukuba uzamile ukuhlenga ingane wangabaleka, mhlawumbe ngabe kayishonanga. “Laba belungu bajwayele ukudlula lapha ngasekhaya uma beya epulazini labo.
"Uma kwenzekile bafika, izingane ziyaye ziye epulazini labo ngoba kuye kube nokuthile abazipha khona. Ngelanga lesigameko, badlule lapha ngasekhaya njengenjwayelo izingane zahamba.
"Uma sizwa zithe sezisendleleni zibuya, umsolwa washayisa ingane kamfowethu yashona. Ukuba uzamile ukuyiphuthumisa esibhedlela, mhlawumbe ngabe ilutholile usizo yangashona,” kusho uNkz Sibiya.
Okhulumela amaphoyisa KwaZulu-Natal, uCapt Nqobile Gwala, uthi kuvulwe icala lokubulala ngokungenhloso kanti amaphoyisa asaphenya. Uthi uma amaphoyisa eseluphothulile uphenyo, icala lizoyiswa enkantolo umndeni uzobe sewaziswa ngokuqulwa kwalo.