Uphenduke idili lomculo umshado kaReggie weMabala
UPHENDUKE inkundla yomculo umshado kaReggie Governor Nkabinde obebopha ifindo lomshado noBeauty maMatela Nkabinde eLynton Hall, ePennington eningizimu nogu leKwaZulu Natal ngempelasonto.
Abaculi bebesina bededelana, izihambeli zilokhu zime njalo ngezinyawo kwazise umculo ubusholo phezulu. Phakathi kwabuculi abashiyelane inkundla singabala u-Andile KaMajola, Mondli Ngcobo, Niama Kay kanye noDJ Siyanda. Izihambeli zibonge kakhulu kuReggie noBeauty ngokuzipha ithuba lokuba yizicukuthwane emcimbini wabo.
Phakathi kwezikhulumi ebezishiyelana inkundla bekungamalunga amaningi kaKhongolose, abekhuluma ezicelela kuBeauty ukuthi angalinge awephuce uReggie ngoba nawo amthatha njengokuthi uwumndeni kaKhongolose. Umculo omnandi obuhambisana nomyalezo uqhululwe ngu-Andile KaMajola othe “ngizodlala ingoma ethi”, “Nanoma niyangibona” athe icelwe uReggie.
Ulandelwe uMondli ofike wenza adume ngazo naye kwase kuba uNiama Kay kwavala oDJ.
UNjabulo Nzuza ongumabhalane omkhulu ku-ANCYL, ubonge uReggie noBeuty ngendlela abamphathe ngayo efika eGoli wakhu- thaza lomndeni ukuba ungalinge uhlukane noKhongolose. UNjabulo uphinde wanxusa uNkabinde ukuthi uthando alunika uKhongolose akaphinde alunike uBeauty.
Kube sekubizwa iMayor yaseKurhuleni, uMzwandile Masina, ukuba azokwenza uhlelo lokuqhunyiswa kweshampeni, yena ufike wamema abake baba abaholi beCOSAS ukuba beze phambili bazomlekelela kuze kube nezinkulumo abazozethula. UMasina weluleke uBeauty ngokuthi angalinge afake isehlukaniso noReggie ngoba lokho kobe kusho ukuthi usifaka kuKhongolose uqobo.
Uhlelo beluphethwe ngobunono nguTbo Touch obe esemema abashadayo ukuba beze bazo sika ikhekhe.
UNkabinde ube eseyivala ngenkulumo ethathe isikhashana impela exoxa ngomlando wakhe nokuhlangana noBeuty uthe: “Sahlangana emshadweni kodwa ngibona nje ukuthi uBeauty wabe engazimisele ngokunginaka ngaze ngabafica behleli kwenye indawana belinde umakoti nomkhwenyana besashutha ngavele ngaqonda eBha ngaswayipha imali ewu R5000.00 qede ngababiza ngathi wozani ngaqhubeka ngamphathela izicathulo kwazise zasezimshisa. Waqala lapho ukungiqaphela ukuthi ngikhona futhi ngifike esho ezibonga. Uqhubekile wabonga bonke ababasekile kusuka em- ndeni wakomalume wakhe kwaNkabinde, umndenini wakaKhawula ukuyikubo kanye noKhongose athe ikhaya lakhe lokuqala alijoyina eneminyaka ewu 15.
Umcimbi wabo uphenduke inkundla yepolitiki njengoba uNjabulo eke wadedela ingoma ethi “iyo weSolomoni” nethi “Oliver Tambo ngibambe ngesandla” kwasukuma yonke indlu yama ngezinyawo. Okuqhaphelekile kulo mcimbi akugcwalanga njengoma bekucatshwanga njengoba bezikhona ezindawo ezingabanga namuntu.
Uhlelo lokuphoswa kwembali nalo alwenziwanga ngoba uthe uReggie ababadingi abantu abazofuna umshado emshadweni wabo. Izidlo neziphuzo eziphambili bezingangamanzi ukuphala ikhumba kunenqola ebihamba no-ice cream obandayo ubuthi udansa nje nansi inqola idlula phambi kwakho.
Njengenjwayelo iMoet iyo ebiphuzwa kakhulu njengoba bekunendawo yotshwala emuva. Izihambeli aziwuvalanga umlomo ngezinga eliphezulu lo mcimbi. Omunye uze wathi noma kungagcwele kakhulu kodwa bambalwa abantu abangenza umcimbi onje.
Phakathi kwezihambeli ebezikhona singabala uTony Yengeni, Sihle Zikalala, Faith Muthambi, TK Ncinza nongqongqoshe wezemfundo eGoli uPanyaza Lesufi.