Utuse ukubekezela komkakhe umphathi weNsimbini Lifestyle
UTUSE ukubekezela nokuzinikela komkakhe usomabhizinisi onendawo yobumnandi ewubukhazikhazi iNsimbini Lifestyle eseFolweni eningizimu yeTheku esiphihlini sedili lomgubho wosuku lokuzalwa kwakhe abemenzele sona kulendawo ngoMgqibelo kusihlwa.
UMnu Mlungisi Makhanya ukhulume kanje emcimbini abewenzele umkakhe uNkk Pinkie Makhanya obegubha iminyaka engama-30 azalwa futhi ebonga ukuqeda iminyaka eyi-14 babopha elikasofasilahlane.
Umcimbi uqale ngokuba kudliwe kwaphuzwa iziphuzo ezibandayo, izihlobo nabangani bakaNkk Makhanya iningi lazo ebeliyizidudula lidlubhe ezimhlophe okungaba ngamabhulukwe noma izingubo.
Kuthe kushaya ihora lesi-9 kusihlwa waqala umcimbi uhlelo luphethwe nguSindy Makhanya ziduma ngengoma.
UNkk Makhanya abambiza ngoSiSi Pinkie bonke ungene edlubhe ezibubende edansa ekhasa phansi, kucaca ukuthi uyiNu ezalwayo futhi inhliziyo imhlophe okwezihlabathi zolwandle.Ube esehlala phansi emamatheka ubala izikhulumi zonke zituse ukubeke-zela kwakhe kepha umyeni wakhe nguye ovale ngehlahla ebabaza isibindi sakhe ekubeni afika ese- mncane.
“Sithandane naye esemncane eneminyaka eyi-17 nje vo ngikhumbula kahle ngimbona egqoke ibhulukwe kwaba nzima engangithandi kepha ngasizwa yisihlobo sakhe.
“Ngiyambongela ngosuku lwakhe lokuzalwa wayibamba ishisa lensimbi, abanakwabo abagane kithi bayazi ukuthi kuphilwa kanjani la kwaMakhanya. Ubekezelele izinto eziningi esesidlule kuzo ngiyamtusa kakhulu,” kuphetha uMakhanya obe esemhlaba ngesinqandi esivuthayo kwabaleka izingane zabo ebezilapho.
Ezibongela uPinkie usukume ngengoma yesonto ethi “Nkulunkulu uthando lwakho “wathi njengoba eseshilo umyeni wakhe ukuthi badlule ebunzimeni ukhulume iqiniso, kepha wathi ukuba uNkulunkulu wayengekho ngakuye ngabe akekho lapha ekhona. Ube esebonga umyeni wakhe nezihlobo nabangani kwasikwa inguzanguza yekhekhe.
Ngaphandle oDJ bebenza abadume ngazo kuze kwashaya ihora le-11 kusihlwa izimoto zilokhu zingenile kugcwele.
Kubonakele ukuthi abantu abazungeze iFolweni sebethole ikhaya labo kwazise izinga leNsimbini Lifestyle liphakeme lithi malicele kwelaseYadini nakoMax's Lifestyle.