IKHUTHAZE INTSHA KWEZEMIDLALO INKOSI YAKWABUTHELEZI
IGQUGQUZELE intsha engaphansi kukamasipala wayo ukuba ezemidlalo izishebe nemfundo iMeya yaseZululand, enyakatho yeKwaZulu-Natal, iNkosi Mzamo Buthelezi ngesikhathi ikhuluma nabezindaba enkundleni yezemidlalo yasoNdini ngoMgqibelo njengoba bekunemidlalo ebizwa ngeMayoral Cup - ngaphansi kweZululand.
Kulesi sigcawu sabezindaba, iNkosi Buthelezi ichaze umasipala wayo njengobhekene nenkulu ingwadla yokusweleka kwamanzi ngenxa yesomiso esihlasele ezindaweni eziningi. Ikhulume kabanzi nentsha iyinxusa ukuba ikhuthalele imfundo ngoba iwukhiye wokuvula iminyango eminingi emhlabeni.
“Namuhla sizodlala kodwa singakulibali ukuthi sinezinkinga eziningi lapha eZululand njengoba isomiso sihlasele ngalolu hlobo. Kukho konke lokhu, sicela intsha yethu ukuba ingagxili kwezemidlalo kuphela kodwa ifunde ngoba kayikho into ebaluleke ukwedlula imfundo. Siyacela nakubazali emakhaya ukuba beseke izingane ngokwemfundo.
"Zingane zethu, sikhona ukuneseka ukuze nifeze amaphupho enu. Noma ngabe ulidlala kanjani ibhola okanye akekho omelana nawe eringini yesibhakela, uma ungafundile kawuphelele. Siyacela ukuba nilisebenzise ithuba lokufunda,” kunxusa inkosi eyiseke- la-mengameli kwiNkatha Freedom Party (IFP). Ithi kuyisifiso sikaMasipala iZululand ukuba kwakhiwe isikhungo sokuqeqesha abatshuzi njengoba kungekho ngisho nesisodwa kulesi sifunda kanti naseMkhanyakude kasikho. “Siyafisa ukuba sibe nabatshuzi endaweni ngoba kuyaye kwenzeke uzwe kuthiwa sekuminze ingane emfuleni. Igcina isiphangalele ngenxa yokuthi sisuke silindele abantu abasuka kude kanti ukuba sinabantu bethu bekungaba ngozi makhaza. Okunye okusemiqondweni yethu wukuba sithathe intsha yalapha emakhaya iyoqeqeshwa ezindaweni ezinazo lezi zikhungo,” kusho iNkosi Buthelezi.
Ithi nakuba ekhona amanzi asemifuleni kodwa kawakulungele ukuba angaphuzwa ngabantu. Inkosi kayigcinanga lapho, isongele ezinye izifunda zomasipala yathi zizolutheza olunenkume emidlalweni South African Local Government Association (SALGA) ezokuba seRichards Bay ngoZibandlela (December) nonyaka. Ithe isho lokhu nje ngoba abadlali bayo kabayona imifece nje kodwa bamelana nabo bonke ubunzima.