Usosizini ohlinziswe okwenkomo esibhedlela
Bamphendule inhlekisa
IFANA neyasejele impilo yowesifazane wasoThongathi, enyakatho yeTheku othi unamahloni okuveza umzimba wakhe phambi kwabanye besifazane ngenxa yokuhlinziswa okwenkomo esibhedlela oSindisweni khona oThongathi ngonyaka wezi2001 eyobeletha.
Kuyimanje usonga ngokulufaka kwabomthetho lolu daba, uNkk Nomusa Ndimande, uMaMchunu (38), emuva kokuzama iminyaka ngeminyaka ukuba asizakale eMnyangweni wezeMpilo KwaZulu-Natal kodwa lutho.
Ngaphandle kokwesaba ukuveza umzimba, uthi kunekhanda elibuhlungu eselaphenduka ingxenye yempilo yakhe emuva kokuba evuke esibhedlela eselele phansi - walimala ekhanda. Udla amaphilisi alo. Uthi uqale ukuzwa esikwa waphuthuma emtholampilo wasendaweni, iNhlalakahle kodwa bamdlulisela esibhedlela.
Uthi belungafakwa lubuya nesixavathi ezisebenzini zasoSindi- sweni, bezikhuluma ezikuthandayo kuyena zimhlukumeza. Utshele ILANGA ukuthi usezame kaningi ukuthola usizo kodwa kunalokho uvele aphenduke inhlekisa oSindisweni. Uveze ukuthi usenawo amagama abahlengikazi abebemhlukumeza kulesi sibhedlela. “Ngingene kulesi sibhedlela ngingenayo inkinga emzimbeni ngafika ngahlukunyezwa kabuhlungu. Besengiyobeletha ingane yesithathu.
"Abahlengikazi besifazane bebe- nolaka olubi. Ngilaliswe embhedeni ngaphaphama sengilele phansi ngihlinzwe kabuhlungu, nginenkebenkebe yengozi ekhanda, izinyawo zivuvukele izingalo ziphazamisekile.
"Okungibulale kakhulu wukwephuka kwethambo langakwesokudla elihlanganisa intamo nehlombe,” kuchaza yena. Uthi nengane yakhe izalwe ikhubazekile, idolo langakwesokudla belibuye ngemuva. “Nakuba ize yaba ngcono kube wumusa nokusebenza okuhle kwezisebenzi zaseGrey's Hospital, eMgungundlovu. Nginamahloni okuveza umzimba wami phambi kwabanye besifazane ngoba isisu sami simidwayidwa yonke indawo. Bangihlinza maqede basibuyisa eceleni, nenkaba iseceleni.
"Okungihlukumeza kakhulu yikhanda elingapheli njengoba ngihlala ngokudla amaphilisi okulithithibalisa. Ngifuna umnyango wezempilo unginxephezele ngoba kangisakwazi kwenza lutho, kakukho lapho ngingasebenza khona. Ubusika nehlobo kuyafana kimina njengoba kudingeka ngihlale ngokubhinca ingubo ngenxa yemithungo ehlala iqaqamba,” kusho uNkk Ndimande.
ILANGA lizame kaningi ukuxhumana nomkhulumeli walo mnyango KwaZulu-Natal, uMnu Sam Mkhwanazi, ucingo lwakhe belukhala lungaphendulwa, luphethe ngokuthi kushiywe imiyalezo. Naleyo miyalezo eshiyiwe kayiphendulwanga.