Kunxuswe amadoda ukuba avikele isizwe
KowoMhlanga eMachobeni
SINXUSE amadoda ukuba akhumbule umsebenzi wawo wokuvikela abesifazane, iSilo uZwelithini kaBhekuzulu, sathi mawahlukane nokucwila ezinkambeni zikaFaro ngoba izwe liyonakala lapha ngaphandle.
Lokhu sikusho eMkhosini woMhlanga obusesigodlweni saso esiseMachobeni eNgwavuma, enyakatho-mpumalanga yeKwaZulu-Natal.
ISilo sibonge omasipala abangaphansi kowesifunda uMkhanyakude ngokweseka lo mkhosi, sathi lokhu kuyinkomba yokuthi balikhathalele ikusasa lesizwe samaZulu.
Sifisele labo masipala ukubusa nokusebenzisana okungenazihibe. Sigxeke abesilisa abasebenzisa umthunzi wezinkukhu, sathi ubenza banganaki futhi benza izinto ezingahlelekile.
“Madoda, ngiyanicela ukuba nivikele abesifazane, ikakhulukazi lezi zingane zami. Into ebulala isizwe wutshwala nomthunzi wezinkukhu, abesilisa okuyizinto abagxile kuzona bangabe besanaka umonakalo owenzeka ezweni. Kuwumgomo wamadoda ukuba avikele abesifazane kodwa manje kakusenzeki lokho,” kusho iSilo.
Sigqugquzele izingane ukuba zikhuthalele imfundo ikakhulukazi umatikuletsheni njengoba sekusele izinsuku ezimbalwa ukuba kuqalwe izivivinyo zokuphela konyaka.
Sithe sifuna izingane ezihamba uMkhosi woMhlanga ziphase ngamalengiso. Sibe sesiyala izintombi nto ukuba ziqaphele zingadlali abesilisa abafika kuzona bazikhohlise, bazenze izimvu kanti bayizimpisi ezifuna ukuqeda ngobuntombi bazo emuva kwalokho bashaye bachithe.
“Kuyisifiso sami ukuba izingane ezigcina leli siko ziphumelele empilweni. Bheka nje ngempelasonto ezayo eNyokeni KwaNongoma, lo mkhosi uzobe uhanjelwe ngabasuka eChina abafuna ukuzotshala imali.
“Lokhu kuyangithokozisa ngoba kuyinkomba yokuthi leli siko lihlonishwa ngisho nasemazweni angaphandle,” kusho iSilo.
Njengokujwayelekile, ibingabonwa nangokhalo nohlangothi lwayo inkosi yesizwe sakwaMngomezulu, uMphumeleli Lubelo II Mngomezulu.
Lo Mkhosi bewesekwe wuMnyango wezobuCiko namaSiko KwaZulu-Natal, obumelwe ngungqongqoshe wawo, uNkk Bongi Sithole-Moloi.
USihlalo weNdlu yabaHoli beNdabuko eMkhanyakude, iNkosi Mabhudu Tembe, yiyona eyamukele zonke izihambeli kulo mcimbi.