Ulithole ekwaluseni elikaNkunzemdaka
ISIFISO sakhe ngesokumela umasikandi wesiXhosa ngenxa yokuthi bayingcosana abaculi bawo abavelele abadabuka e-Eastern Cape lapho ezalwa khona uMlindelwa “Nkunzemdaka” Mralatya (60) waseBhizana.
Ungomunye wabaculi abaziwayo emculweni wesintu futhi oseyibambe isikhathi eside njengoba namadodana akhe esengene athi shi kuwona ngenxa yokubona impumelelo kayise.
Iminyaka yale nsizwa isihambile kodwa uma ulalela umculo wayo, ngeke ukuzwe lokho ngoba iphimbo layo liseyinto eyodwa namanje. ILANGA likuthatha likubeke ngebanga eselihanjwe nguNkunzemdaka kwezomculo. Inkunzemdaka uma izihasha ivamise ukusho kanje: “Ngazibamba mina Nkunzemdaka, Sibi siyasabeka Mfo kaKhweshube eBhizana, Umnyama gusha kuyavunwa kulawo masimu. Khwenxela msila bhoho ngoba ilanga libalele, Ngeyembuzi Beyineneneka nje”
UNkunzemdaka uthi ebuncaneni bakhe ubelusela omunye ubaba imfuyo, obekuthi uma eyokhipha izimbuzi emahlangeni bese emuhasha ngalezi zihasho (uNkunzemdaka). Uthi lo baba ubesho kanje ngoba ebona ukuthi uNkunzemdaka uyinsizwa ezothile ngokwebala.
“Bekuthi noma ngisemasimini uma ngiyokhipha izimbuzi, ngimuzwe lo baba esememeza engihasha kanje nakuba ngingenayo incazelo eqinile ngazo izihasho,” kusho yena.
Uthi igama abebizwa ngalo esakhula bekunguThobazithathe kanti ezinye izinsizwa bezithi yinkunzi engcolile.
Le nsizwa ithi ubugagu bayo buqale ukubonakala isencane kakhulu isalinganiselwa eminyakeni eli-17 ubudala ngoba yiyona ebihlabelela uma kunemicimbi emakhaya.
Ithi kakugcinanga lapho ngoba nasebugoseni idlule khona. Itshele ILANGA ukuthi ngenxa yokuhlulwa isikole kwaGrade 4 eFundambili Primary School, ithathe isinqumo sokuyofuna amatoho yase isebenza enkompolo emobeni endaweni yaseMzinto kwaZulu-Natal yaphinde yasebenza naseThekwini idonsa izinqola emakethe.
Ithi eMzinto idibane khona nenye insizwa igama layo okunguMnu Mphendukelwa Mkhize ebikwazi ukudlala isigingci.
“Ngesikhathi ngisesemakhaya, bengikwazi ukukhalisa imfiliji kanti-ke le nsizwa
ya- kwaMkhize ibukhali entanjeni yangipheka. Ngokuhamba kwesikhathi, ngibone ukuthi sengiyakwazi ukukhalisa intambo ngalibangisa emsakazweni uKhozi FM eThekwini, ngifice umsakazi okuthiwa nguMasonto Buthelezi ngamtshela ukuthi njengoba ngilapha emsakazweni ngifikele ukuzosakaza wabe esethi ngizosakaza kanjani nesigingci. “Uthe esengilungisa wathi empeleni wena uzoqopha lapha ngabe sengivuma. “Akachithanga isikhathi wangirekhoda ngaphakathi emsakazweni iculo elilodwa wathi emuva kwesonto ngizobe sengiyizwa emoyeni le ngoma ikhala, ngempela ngayizwa,” kusho uNkunzemdaka. Uthi idlaliwe le ngoma yakhe wabe esekhuthazwa nguMnu Welcome “Bhodloza” Nzimande oke wasakaza oKhozini wathi makayoqopha eGoli ngoba sekuzwakele ukuthi likhona ikhono. Utshele leli phephandaba ukuthi kuthe uma efika eGoli waya kwesinye isitudiyo adibane kusona neKhansela noJBC bekoqozisa bonke kwabe sekuqhamuka enye insizwa yabeluleka yathi mabayozama eGallo Records ngoba le ndawo abaqopha kuyona kayikho ezingeni eliphezulu. Uveze ukuthi kabachithanga sikhathi, balibangise khona bafike bazichaza base beshaya izigingci zabo bavele bathathwa bobabili neKhansela, besizwa nguphrojusa wakhona eGallo, uWest Nkosi noMnu Joseph Makwela baqoshwa eDowntown Studio. I-albhamu yakhe yokuqala ethi “Bhubesi Nali iBhubesi” iphume ngonyaka we-1985 Yiyona emthathe yambeka ebalazweni. “Ngisebenze kahle nale nkampani kwathi emuva kwalokho ngasayina ngaphansi kweCool Sport kwaba khona ukungeneliseki emalini ngagcina sengisebenza ne-Universal Records. “Umculo ngiwuxakekele kakhulu yingakho namanje ngiwuhlonipha,” kusho uNkunzemdaka.
Uthi uthando lomculo kuyena lugqugquzelwe wumculo kaPhuzushukela Bhengu (ongasekho) waseNkandla, maphakathi neKwaZulu-Natal njengoba namanje esadlala isigqi esincike emculweni wakhe.
Utshele ILANGA ukuthi usezinhlelweni zokudedela i-albhamu entsha ethi “Uzalo Lungilahlile” ayiqophe nyakenye nakuba ingakaphumi.
Useqophe ama-albhamu angama-32 wahlabana ngezindondo esibala kuzona eSouth African Traditional Music Achivements Awards (Satma) neSouth African Music Awards (Sama) kanti kuwona lo nyaka ubehlonishwa kuMantshontsho Kamasikandi Awards eThekwini ngeqhaza lakhe emculweni wesintu.
Unezingane eziyisi-7 okungabafana abathathu namantombazane amane. Amadodana akhe amabili, uNkunzencane noPhumakhasi aseyacula nawo.