Ugezeke igilo uMntwana waKwaPhindangene
Kwethulwa ngokusemthethweni isigcinamagugu sakhe
IKHUMBULE amazwi kaMnu Nelson Mandela awasho ngoNhlaba (May) wezi-2002 iNkosi Mangosuthu Buthelezi ngesikhathi kwethulwa ngokusemthethweni iPrince Mangosuthu Buthelezi Legacy Preservation Project, kugujwa nosuku lwayo lokuzalwa emcimbini obuseGarden Court oNdini, enyakatho yeKwaZulu-Natal ngempelasonto edlule.
UMnyango wezobuCiko namaSiko KwaZulu-Natal ububambe iqhaza elikhulu ekwethulweni kwalesi sigcinamagugu salo mholi ongumengameli weNkatha Freedom Party (IFP).
INkosi Buthelezi ithe amazwi kaMnu Mandela athi: “Sesisebenzise konke esinakho ukuzama ukumqumba phansi kodwa sehluleka, usekhona, unguphunyukabemphethe ngeke sikwazi ukumziba.
“Uyinsimbi kayigobi, umangalise abaningi njengoba acacisa ngokusobala ngezingqinamba ahlangabezane nazo emlandweni weNingizimu Afrika.
“INkosi Buthelezi ithi bekuzoba nzima kakhulu emlandweni waleli lizwe ukuba i-African National Congress (ANC) ibizowaziba amagalelo ayo.
“Ngokwezifiso zabaholi abafana noMnu Alfred Nzo, umlando wami ubuzophelela emgqonyeni. UMnu Joe Slovo walibeka ngembaba ngaphambi kokhetho lokuqala lwentando yeningi ukuthi ngiyogcina ngiyiphunga nje emlandweni,” kusho iNkosi Buthelezi ebonge uNgqongqoshe wezobuCiko namaSiko KwaZuluNatal, uNkk Bongi Sithole-Moloi.
Ithe ungqongqoshe wenze isibonelo sentando yeningi ngokumhlonipha ngalesi sipho sokwethulwa kwale projekthi - wathi kuyathokozisa ukuba kube ngungqongqoshe wesifazane ongumZulu owethula lesi sigcinamagugu. ‚
“Kanginawo amazwi okuveza ukuzithoba kwami. Emhlabeni jikelele, emazweni okubusa kuwona intando yeningi, uma iqembu lingena emandleni lengamela bonke abantu abaphila kulona. Kumele lilalele bonke abantu balelo lizwe, hhayi abalivotelile kuphela. Lokhu (okwenziwe wumnyango) kuveza isibonelo esihle sokubusa kwentando yeningi,” kusho iNkosi Buthelezi.
Ithi okwenza lesi sipho (umnyango weseka isigcinamagugu sayo) sibaluleke kakhulu empilweni yayo. Ithe lesi sigcinamagugu sizohlomulisa abantu abaningi okubalwa abacwaningi, abafundi nosomlando.
INkosi Buthelezi ikhumbule incwadi eyithunyelelwe ngowayengumengameli waseZambia, uMnu Kenneth Kaunda, lapho iveze ukuthi ukuvulwa kwale ndawo yokugcina amagugu izosiza abantu nangezinye izigaba zomlando ezithinta iNingizimu Afrika futhi izokhuthaza inqwaba yabantu ukuze bacobeleleke ngolwazi.
Inkosi ibonge nomQondisi oMkhulu wephephandaba ILANGA, uMnu Arthur Konigkramer, ngomsebenzi wakhe oncomekayo ekuqinisekiseni ukuthi lesi sigcinamagugu siqhuba kahle.
Ithi lesi sigcinamagugu ngeke sigcine ngezinto ezithinta iqembu layo kodwa sizohlanganisa nezinye izikhundla zayo ezikhona nalezo eseke yaziqhoqhobala.
Phakathi kwalezi zikhundla kubalwa esokuba yinkosi yesizwe sakwaButhelezi, ngundunankulu kahulumeni wakwaZulu omdala, nguNdunankulu kaZulu, wukuba ngungqongqoshe wokuqala wezasekhaya ngaphansi kukahulumeni wentando yeningi nesokuba yibamba likamengameli waseNingizimu Afrika.
Walibeka ngembaba ukuthi ngiyogcina ngiyiphunga nje emlandweni.