ISharks izibuyise zishisa
Abingelelwe ngenduku awakuleli e-Europe
IZIPHINDISELE kabuhlungu iCell C Sharks kwiToyota Free State Cheetahs iyinenebula ngo-45-15 koweCurrie Cup ngoMgqibelo ntambama eGrowthpoint Stadium, eThekwini.
ISharks ibhabhadiswe yiCheetahs ngo-47-12 kowokuvula lo mqhudelwano mhla zingama-21 kuNtulikazi (July), okwenze abalandeli bayo babila yintukuthelo. Emdlalweni wangoMgqibelo ubungafunga ukuthi iSharks yenze idili lama-try njengoba icamelise ayisi7. Yize leli qembu laseThekwini linqobe ngembudlu kodwa iCheetahs iwuqale kahle umdlalo kubhoke uLuther Obi (winger) obonakale egqamile umdlalo waze wayophela.
Nokho kube nzima ukubhekana nenjejane yoShaka okubalwa kuyona uSbusiso Nkosi (winger), u-Innocent “Inny” Radebe (flyhalf/ fullback), uBenhard Janse van Rensburg (flyhalf), uLouis Schreuder, uMarrius “Marra” Louw (inside centre) ukubala abambalwa. Bekubhoke noLubabalo “Tera” Mthembu (8th man), uLukhanyo Am (inside centre) no-Akker van der Merwe (hooker) abebenyakazisa amadoda kungabi ndaba zalutho.
U-Obi uzamile ukubuyisela ezakhe emdlalweni kwasho ukuthi kazinawo amandla okumelana neSharks. Indlela iSharks ebidlala ngayo, ibiyihlakaza iCheetahs, ibhola iliphaselana ngokushesha ibe isebenzisa isivinini esiphezulu, kakhulukazi emaphikweni lapho bekugijima khona uNkosi noTythan Adams (winger) obedlala umdlalo wakhe wokuqala koShaka. U-Adams obevutha bhe kulo mdlalo, uthole ithuba ngenxa yokungabi khona kuka-Odwa Ndungane noKobus van Wyk ephikweni. Ubengena emadodeni kuvalwe amehlo kanti uNkosi yena - ogcine eqokwe njengomdlali wosuku - ubeshelela njengommese oshisayo ebhoteleni ezitobheni zeCheetahs okwenze wacamelisa ama-try amabili. Isiyonke imiphumela yeCurrie Cup yangempelasonto imi kanje:- Sharks 45, Cheetahs 15; Golden Lions 29, Pumas 28; Blue Bulls 44, Griquas 42.
Abingelelwe ngembudlu amaqembu amabili aseNingizimu Afrika ajoyine iGuinness Pro14 - egijinywa ngamaqembu aseEurope - esuka kwiVodacom Super Rugby. Induku iqale kwiCheetahs ngoLwesihlanu eBelfast, e-Ireland njengoba ihlulwe yi-Ulster ngo-4219. Kulandele iSouthern Kings ngoMgqibelo yona ebhabhadiswe ngo-52-10 yiScarlets yaseWales eyizingqwele zalo mqhudelwano obubizwa ngoPro12 ngesizini edlule. IScarlets okubukeka kuyiqembu lemindeni embalwa - njengoba inabadlali abane bakwaDavies, abayisihlanu bakwa-Evans, ababili bakwa-Owen nabathathu bakwaWilliams - ikhombise zisuka nje ukuthi kayiyele ukuyosinisa amahleza enkundleni. Nokho leli qembu linqoba nje, belidlala neKings esabunjwa njengoba iningi labadlali ebeligijima kuyona kwiSuper Rugby lithole amadlelo aluhlaza kwezinye izindawo.
Isiyonke imiphumela yePro14:Connacht 12, Glascow Warriors 18; Scarlets 57, Kings 10; Newport Gwent Dragons 16, Leinster 39; Ospreys 22, Zebre 13; Cardiff Blues 10, Edinburgh 20; Munster 34, Benetton Treviso 3; Ulster 42, Cheetahs 19.