IQEDE ISHOBOLO LEMINYAKA I-KEYONA TEAM
KUPHUME ibhadi iNedbank Keyona Team ishaya igoli lokuqala ngqa selokhu kwaqala umkhankaso eminyakeni eyisihlanu edlule ukuthi izingqwele zeNedbank Cup zibhekane neqembu lekhethelo eliqokwa yithimba eliholwa nguEphraim “Shakes” Mashaba.
IKeyona Team iqede ishobolo ihlohla igoli ihlulwa yiSuperSport United ngo-2-1 izolo ngeSonto eMakhulong Stadium, eTembisa. Igoli leSuperSport lokuvula inkundla kulo mdlalo liqotshelwe enethini nguThuso Phala ngomzuzu wama36 kwathi elokunqoba labekwa enethini ngu-Aubrey Modiba ngowama-45. UModiba ungumkhiqizo weKeyona Team njengoba ephume kuleli qembu ngonyaka odlule. Igoli leKeyona lize noZanoxolo Mdluli waseMonti ngomzuzu wama-96.
U-Eric Tinkler oqeqesha iSuperSport, uncome kakhulu abadlali bakhe kubalwa nabagijima kwiMultiChoice Diski Challenge (MDC) abazwise umdlalo ngesiwombe sesibili.
“Ngesiwombe sesibili ngigadle ngabadlali bethu abancane abagijima kwiMDC ngoba nemidlalo yakhona isizoqala. Yingakho bekubalulekile ukuba ngibanike ithuba elanele lokudlala. Esiwombeni sesibili kubonakele ukuthi iKeyona Team ibisihlangene seyibhoke nxa zonke,” kusho uTinkler.
UMike “Sporo” Mangena ongomunye wabaqeqeshi beKeyona, uncome abadlali baleli qembu ngokuba nesibindi.
“Kulo mdlalo sishaye igoli lethu lokuqala sibhekene nekilabhu eyizingqwele zeNedbank Cup okuyinto engasoze yacisha emlandweni waleli qembu kwazise sekuyiminyaka eyisihlanu sizama. Amanye amakilabhu abhudluzwa ngo-6-0 (kudlala ontanga bodwa) kodwa bheka elethu iqembu liguqiswe no-2-1 okuwumphumela ongakhalisi kakhulu yize bekumele sinikwe iphenathi,” kusho uMangena.
Uthi nakuba bonke abadlali bewudlale kahle umdlalo kodwa ukhombise okukhulu ukuvuthwa unozinti wabo, uMduduzi Khumalo odabuka KwaHlabisa ojutshwe ukujima ne-Orlando Pirates.
“Ngibona sengathi lo nozinti uzokuya kude kunobhutshuzwayo uma ezoqhubeka nokulalela nok uzimisela,” kusho uMangena.
UMakhosandile Plaatjie uqokwe ukuba ngumdlali wosuku okwenze wahlomula ngo-R10 000 wakwaNedbank.
UPlaatjie uncome ukuzimisela kubadlali beqembu labo. Uthi umvuzo wokulalela nokusebenza kanzima enkundleni ubonakele. Uthi lokhu kusho lukhulu kubona ngekusasa labo kwazise umsebenzi uyaqala njengoba sekumele bayozama ukuthatha iso kubaqeqeshi bamaki-labhu agijima kwi-Absa Premier-ship ngokwahlukana.
Okuqaphelekile kulo mdlalo wukunyuka kwezinga labadlali beKeyona abebekhombisa ukungayihloniphi nhlobo iSuperSport.