UBOBBY USABELA IKHWELO LEZIMPOFANA
IMENENJA jikelele yeKaizer Chiefs uBobby “Bobsteak” Motaung ithi bayasizwa isililo sabalandeli babo futhi bazokwenza ngawo wonke amandla ukubuyisa izinsuku zenjabulo kule kilabhu.
IChiefs iyivule kabi iligi njengoba ingakaze inqobe ngisho umdlalo owodwa.
Ukubhinjelwa yizinto kwale kilabhu sekuholele ekutheni abalandeli bayo bafune kuxoshwe umqeqeshi uSteve “Mphathi” Komphela. Bakhala ngokuthi ngeke abenzele lutho akahambe sekwenele lokhu okubi akwenzile.
Abalandeli bakhala nangokuthi usebaphendule inhlekisa kwizimbangi njengoba bengcofwa ngapha nangapha.
Bakhala nangabadlali bale kilabhu bathi sebephelelwe ngushatini kudingeka ikilabhu ihlakazwe kulandwe abadlali abasha.
UMotaung uthi bayasizwa isililo sabalandeli babo.
“Ngifuna ukukusho ukuthi siyalizwa izwi labalandeli bethu nezikhalo zabo ngokunjalo, siyalijabulela iqhaza abalibambayo.
"Kodwa-ke kufanele sibumbane siyilwe le mpi sibuyise izinsuku zenjabulo ekilabhini,” kusho uMotaung.
Uthi nakuba iwindi selivaliwe kodwa ngeke baliphose ithawula basazoqhubeka nokuthungatha umgadli ozobatakula kule nkinga yamagoli ababhekene nayo.
“Ukuthi iwindi lokudayiselana ngabadlali selivaliwe akusho ukuthi sesiyekile ukuthungatha umgadli, sibheka yonke indawo.
"Sisazoqhubeka nokubheka umhlaba wonke kuze kube siyayithola insizwa ezosisiza ngamagoli,” kusho uMotaung.
IChiefs imatasa ithungatha umgadli nje, kodwa nasemuva kubukeka kuzofanele iqale ibhekisise kwazise izitobha zayo zikhombisa ukwehlelwa yifomu.
U-Eric Mathoho noLorenzo Gordinho okuyibona abawudonga lweChiefs bakhombisa ukuba buthaka kulezi zinsuku.
UDUMELE UBROCKIE NGESINQUMO SE-SS UTD