UPitso udube uKhama Billiat
Wenqaba ukwelula inkontileka ekubeni ikilabhu isamdinga
UMQEQESHI weMamelodi Sundowns uPitso “Jingles” Mosimane udube uKhama Billiat okuvela ukuthi unqaba ukwelula inkontileka nezakhe ekubeni le kilabhu isamdinga.
ISundowns ingene kwezwakala emakethe njengoba isayinise abadlali abaseqophelweni eliphezulu.
Phakathi kwabadlali ebasayinisile kungabalwa u-Oupa “Ace” Manyisa obengukaputeni weOrlando Pirates, uRivaldo Coetzee obedlala emuva kwi-Ajax Cape Town noGeorge Lebese obedlala kwiKaizer Chiefs ukukha nje phezulu.
IDowns ihluleke yancama uku- sayinisa uLebogang Manyama ebimfuna ogcine eqome ikilabhu yaseTurkey, iKonyaspor.
Nokho lo mdlali akakasayini ngokugcwele njengoba esalinde ukuhlolwa isimo sempilo bese kuphasa yonke into.
Leli phephandaba lihoshe ngemithombo yalo ukuthi uMosimane unqume ukuduba uBilliat okuvela ukuthi unqaba ukwelula inkontileka yakhe nale kilabhu.
Kuthiwa njengoba uMosimane ebefuna uManyama nje yingoba ubefuna ukumbeka ebhentshini uBilliat ukuze azibone ukuthi akasiyona iSundowns eyedwa.
UMosimane kuthiwa emuva kokuba lo mdlali nomphathi wathe becele ukuba zimiswe izingxoxo ulibeke ngesihloko elokuthi akahambe uma ethanda akanamse- benzi.
Kuthiwa uBilliat unqaba ukwelula inkontileka yakhe neSundowns nje, yingoba ufuna ukuya ekilabhini yaseSaudi Arabia okuthiwa imthembisa itshe lemali.
Kunamakilabhu ase-Europe okuthiwa amgaqele lo mdlali.
“UMosimane usemdubile uBilliat ngisho angahamba akanandaba uyazi ukuthi uzomthola umdlali ozovala isikhala sakhe.
Njengoba ngikhuluma nawe nje akahleli ufuna umuntu ozovala isikhala sakhe ukuze amubeke ebhentshini kumbe amlahle ezihlweleni.
Esingakwazi nje wukuthi usazoqhubeka yini nokumdlalisa njengoba lo mdlali enqume ukumisa izingxoxo okucacela lo mqeqeshi ukuthi umqondo wakhe awusekho kwiDowns usukwenye indawo,” kusho umthombo waleli phephandaba.
Leli phephandaba lishayela uThulani “TT” Thuswa wezokuxhumana kwiDowns ngalolu daba uthe: “Isimo sinjalo nje uBilliat nemenenja yakhe bacele ukuthi izingxoxo zimiswe ukuthi kuze kube nini asazi.
"Kodwa-ke asizukumncenga akekho umdlali omkhulu kuneSundowns.
"Abadlali bayafika bahambe lana kodwa ikilabhu iqhubeke nokwenza kahle.
"Noma naye angahamba iSundowns izoqhubeka idle izicoco,” kusho uThuswa ezakhe ezizimisele ngokuvikela isicoco seCaf Champions League ezisinqobe nyakenye.