UYINYAMA KWI-NFD UMQEQESHI WE-MVOTI FC
UYINYAMA umqeqeshi woMvoti FC obhekwe ngabomvu kule sizini ezokwethwasa yeSouth African Football Association (Safa) KwaZulu-Natal ABC Motsepe League.
ILANGA lihoshe ngemithombo yalo engashayi eceleni ukuthi uBheka “Mlisa” Phakathi ocija le kilabhu ucathanyelwa yiMbombela United neSuper Eagles okungamakilabhu agijima kwiNational First Division (NFD). Kuthiwa womabili la makilabhu azimisele ngokumphatha ntofontofo uPhakathi ozakhele udumo egijima kwi-Orlando Pirates neLamontville Golden Arrows. Kuthiwa inkinga enkulu kaPhakathi wukuthi unobudlelwano obuhle kakhulu noBonginkosi Gwala ongumnikazi woMvoti FC futhi akaziboni esuka kule kilabhu kwazise ufuna ukuzakhela elakhe igama kwezokuqeqesha ngokuyinyusela kwiNFD.
Umthombo oncikene noPhakathi, uthe: “Inzima indaba kaBheka ngokushiya uMvoti. Ngeke ngikuphike ukuthi uyafuna ukukhula naye ebholeni kodwa akathandi ukuzidalela amazinyo abushelelezi kungenasidingo ekilabhini yakhe.”
UGwala uzwakalise ukwethuka ngalolu daba lokushelwa kukaPhakathi ngamakilabhu agijima kwiNFD. Uthi akanalo ulwazi olunjalo futhi okuhle kakhulu wukuthi bayazwana kakhulu noBheka.
Omunye umqeqeshi osikazwa yizikhulu zeMbombela nguSammy Troughton oxoshwe ngendlela engaqondakali kwiFree State Stars emasontweni amabili adlule. Kuthiwa izikhulu zeMbombela zizama ngayo yonke indlela ukuthola omunye umqeqeshi. Kuthiwa iMbombela njengamanje icijwa nguPiet Chauke obeyiphini lika-Ashwin Sutton. Nokho kuthiwa izikhulu ziyabona ukuthi umsebenzi uyamusinda.
Ethintwa uTroughton mayelana nokuyamaniswa kwakhe ngomsebenzi weMbombela, uthe ubengakathintwa muntu ngawo. Uthi angawujabulela umsebenzi nakwiNFD yinqobo nje uma ikilabhu inezinhloso ezifanayo nezakhe. Uthi akafuni ukuzibona esengena ogibeni olumehlele kwiFree State Stars axoshwe engazelele kuyona. Uthi kumele kube yikilabhu ezokuba nezinhloso ezifanayo nezakhe.
UPatrick Mabuza oyimenenja yeMbombela United uthe ubengakezwa ngendaba yokuqashwa komqeqeshi omusha. Uthi okwamanje basenaye umqeqeshi okunguChauke oyibamba.