AKALUBHADANGA ESIGCAWINI SOKUQONDISWA UBUGWEGWE
ILUNGA lephalamende le-African National Congress (ANC), uDkt Makhosi Khoza, kalilubhadanga izolo ngeSonto esigcawini sokuqondiswa izigwegwe - esigcine sihlehlisiwe - esihlelwe yiqembu lalo KwaZulu-Natal njengoba selibuye lesatshiswa futhi.
“Isigcawu siqale isikhathi sesedlule ngehora lonke, engabonwa (uDkt) Makhosi Khoza obemelwe nguzakwethu uSmanga Sethene othe akekho nje, yingenxa yokuthi wesatshisiwe izolo (ngoMgqibelo) kusihlwa,” kusho isitatimende se-ANC KwaZuluNatal.
Lesi sigcawu sizophinde sihlale ngeSonto mhla zili-17 kwephezulu emahhovisi e-ANC KwaZulu-Natal “ngokwesicelo somele (uDkt Khoza), oqokwe izolo (ngoMgqibelo) kusihlwa, wangakwazi ukuhlelela kahle ukuhlala kwesigcawu”.
Ekhasini lakhe leFacebook, uDkt Khoza uphendule abathi makasungule iqembu lakhe lezepolitiki ngokuthi uyawuthanda lowo mbono.
Kuke kwaba nokudideka mayelana nesikhathi okuhlelwe ngaso ukulalelwa kodaba lukaDkt Khoza njengoba yena ebethi utshelwe ukuthi kuzoqala ngehora le-15h00 hhayi ngelesi-09h00 njengoba ikomidi belisho.
NgoLwesihlanu utshele iNews24 ukuthi unovalo lokulalelwa unyendle lapho kuzodingidelwa khona udaba lwakhe kwazise kudlangile ukubulawa kosopolitiki KwaZuluNatal.
Lo mholi ubekwe icala lokuhlaza i-ANC. Uyinyathele emsileni ngokweseka umbono wokuba uMengameli we-ANC nezwe, uMnu Jacob Zuma, akhahlelwe ngevoti lokungamethembi futhi wakuveza ukuthi sekumele ehle kwesokuhola izwe.
Izolo ekuseni ubhale ekhasini lakhe leFacebook ukuthi uphanyekwa emnqamulezweni nje, yingoba yena nenkohlakalo yinkukhu nempaka.
UDkt Khoza akaqali ukusatshiswa njengoba sekuke kwabikwa kaningana ngakho kwaze kwasatshiswa ngisho namadodakazi akhe.
Isigcawu siqale isikhathi sesedlule ngehora lonke, engabonwa (uDkt)...