Ushaye umkhwekazi wamshiya emabokoboko
Umsolwa ubelande izingane zakhe
UDLIWA yingebhe umndeni wakwaMwelase, eShiyane, eRorke's Drift, maphakathi neKwaZuluNatal emuva kokuba umkhwenyana wawo eshaye isalukazi sakhona esiwumkhwekazi wakhe, wasishiya simabokoboko.
Yize eboshiwe uMnu Philani Mpanza (38), ngokushaya uNkk Minah Mwelase (67), lo mndeni uthi kawazi ukuthi uyokwenzenjani uma umsolwa enganikwa ibheyili.
ILANGA lithole ukuthi uNkk Mwelase uze ushaywa nje, ubezama ukukhuza uMnu Mpanza eshaya indodakazi yakhe (uNkk Mwelase).
UMnu Mpanza kuthiwa ugasele kwaMwelase ngeSonto eledlule ekuseni wadedela isibhaxu kunina wezingane zakhe, ezinganeni zabo ezimbili ezincane nakumlamu wakhe ethi uyolanda izingane abangafuni nazo ekhweni.
Kuthiwa uNkk Mwelase uzibize- le ulaka lukaMnu Mpanza ngoba nje ekhuza umsindo osuqhuma phezulu emzini wakhe - kwabe uzithintele, washaywa naye. Ilunga lomndeni elicele ukuba ligodlwe igama lalo, lithi banovalo ngenxa kaMnu Mpanza - obelokhu egcogcoma kulo muzi ebasabisa - ngoba kabazi ukuthi uma eke wa dedelwa yini azobenza yona.
Utshele leli phephandaba ukuthi ukungaboni ngaso linye phakathi komndeni wakwaMwelase nomsolwa, kuqale ngoba ubehlukumeza ingoduso yakhe ezalwa nguNkk Mwelase, eyishaya nsuku zonke ekubeni engalobolile. “Lo muntu ubeshaya ubabekazi emhlukumeza nezingane zakhe. "Ugogo unqume ukumlanda wathi makabuye ekhaya (ubabekazi) ngoba uyahlukumezeka emzini. "NgeSonto kufike yena umlamu wethu wathi uzocela konke okungokwakhe, wathatha izingane wazishaya. Siphumele emnyango sonke sizama ukulamula ngoba ubesehudula phansi nobabekazi.
"Uvele wadedela isibhaxu kubona bonke abantu. Kakusikhona okokuqala enza le nto, uyafika asikhombe ngesibhamu akhulume namaganyana kodwa engaboshwa.
"Nakuba ngingenabo ubufakazi obuphathekayo kodwa ngiyasola ukuthi inkulu imali lo muntu ayikhokhela amaphoyisa ngoba maningi amacala esimvulela wona kodwa akaboshwa, sivele simbone esengaphandle lingathethiwe necala,” kusho ilunga lomndeni.
Lithi bazizwa bengaphephile ngoba kabazi ukuthi kuzokwenzekani uma esephumile umsolwa. Litshele ILANGA ukuthi isimo sikaNkk Mwelase sibucayi njengoba esedluliselwe kwesinye isibhedlela emuva kokuba eshaywe ngensimbi yokudonsa ucingo uma kubiyelwa. “Ngaphambilini ufikile lo muntu wahlasela, salivula icala wadedelwa singaziswanga lutho singabamangali. Kasisakwazi ukuhlala ngokuthula, sicela umphathi wamaphoyisa asibhekele le nto emaphoyiseni esibika kuwona,” kusho ilunga lomndeni. Okhulumela amaphoyisa KwaZulu-Natal, uColonel Thembeka Mbhele, uthi icala lokushaya livulwe esiteshini samaphoyisa eHelp- mekaar. UMnu Mpanza uvelile eNkantolo yeMantshi yaseDundee ngoLwesithathu. Kulindeleke ukuba abuyele namhlanje ngoMsombuluko.