KUKHALWA NGOTHISHANHLOKO OBHUBHUDLA IMALI NOMFOWABO
KUBIKWA ukuthi kwenile yizinkinga eVelakwenile High School, eThengani, eManguzi, enyakatho-mpumalanga yeKwaZulu-Natal njengoba amalunga omphakathi esola uthishanhloko wakulesi sikole ngokuzibusisa ngemali yaso ebambisene nomfowabo ongusihlalo wasigungu esilawula isikole.
Amalunga omphakathi athi uMnu Wonder Mathenjwa onguthishanhloko wakulesi sikole uzenzela umathanda, akafuni kube nemihlangano yokubonisa abafundi, kanti imikhuba eminingi kusolwa ukuthi uyenza nomfowabo, uMnu Abraham Mathenjwa. Leli phephandaba lithole ukuthi kwalesi sikole - esakhiwe eminya-keni engaphezu kwama-30 edlule - kasinakiwe, abafundi baququdwa ngamakhaza nezimvula ngesikhathi sokufunda.
Kubikwa ukuthi ingxenye yabafundi ihuqa insangu maqede ingene emagcekeni esikole iyobhozomela othisha. Laba bafundi bangena behlomile futhi kakukho nonogada oqashelwe ukuqapha isimo kulesi sikole. Lokhu kufakazelwa yisigameko esisanda kwenzeka lapho kugwazane abafundi bengaphakathi esikoleni.
Ingxenye yabazali namalunga omphakathi, izwakalise ukukhathazeka ngokwehla kwezinga lokuphasa kwabafundi kulesi sikole. Kubikwa ukuthi kunabafundi abesabisa othisha ngokubaloya, babatshele ukuba babaphasise ukuze bezofika kalula kumatikuletsheni. Imiphumela kamatikuletsheni kuthiwa ilokhu ishone phansi.
“Okusikhathaza kakhulu wukuthi njengoba sekuzoqalwa izivivinyo zokuphela konyaka, abafundi bahlupha kakhulu. Uma sithi singena esikoleni ngenhloso yokhuluma nabo, uthishanhloko ulwa nathi. Lokhu kwenza sibe nemibuzo ngokuthi yini esaqokelwa yona. Mina ngavuma ngoba ngivele nginesifiso sokuba yingxenye yabantu abakhathalele imfundo emphakathini. Uthishanhloko uvele asithathe njengezinto ezingenamsebenzi walutho.
“Uma sifuna ukwazi ukuthi imali yesikole isebenza kanjani, kuthiwa siyahlupha. Kulungile mabazibusise bahambele phezulu ngale mali yesikole kodwa kunosuku oluyofika, kuyodingeka bayikhokhe yonke kusuka lapho baqala khona ukuyidla,” kusho umthombo oyilunga lesigungu esilawula isikole.
Omunye wabazali owaziwa kakhulu ngokungahambisani nezenzo eziphambene nomthetho, utshele ILANGA ukuthi iyamkhathaza indaba yemikhuba eyenzeka kulesi sikole. Omunye wothisha besifazane utshele ILANGA ukuthi kukhona nabafundi besifazane okwaziwayo ukuthi bayayihuqa insangu. Uma sebebhemile baye bathembise ukuthela othisha besifazane ngesibhaxu. Lo thisha uthi uneminyaka emithathu efikile kulesi sikole kodwa kumanje usezinhlelweni zokushiya ayofuna esingcono.
“Mina ngihlaliswe wukuthi kanginaso isikole engingafundisa kusona, ngabe kudala ngashiya. Uthishanhloko nomfowabo bazenzela umathanda lapha esikoleni. Kabafuni sikhulume nabafundi sibayale ngokubaluleka kokuziqhelelanisa nezidakamizwa. Imali yesikole idliwa bume.
“Impela kasazi ukuthi lo baba usicabangelani ngoba abafundi kabasihloniphi, basithembisa ukusishaya. Babodwa abasithembisa ukuthi bazosiloya uma silokhu silandelana nabo. Okubi kakhulu siyahlazeka thina ngoba ukungaphumeleli kwabafundi ngendlela efanele, kwenza kubonakale sengathi umsebenzi kasiwenzi ngendlela efanele,” kusho lo thisha ocele ukuba kugodlwe igama lakhe ngoba esaba ulaka lwabafundi.
Uthishanhloko uthe kakulona iqiniso ukuthi udla imali yesikole. Uthe kuningi akwenzayo ngale mali.
“Kakukho mali yesikole engiyidlayo mina, laba abakubizele lapha bafuna ukungcolisa igama lami nje ngento engekho. Imali isebenza ukuthenga amaphepha kulungiswe nemishini yokufothokhopha, sithenga nensipho yokuhlanza isikole. Maqondana nokuthi abafundi bangena nezikhali, kangazi lutho.
“Uma kunabantu abangagculisekile mabeze phambili nezinkinga zabo sibonisane ngazo. Kakuwona umqondo nombono omuhle ukuthi bagijimele emaphephandabeni ngezinkinga zesikole. Ngokwazi kwami yonke into ihamba kahle lapha esikoleni. Maqondana nokwakhiwa kwesikole, lokho kakuqondene nami, kusezingeni lesifundazwe,” kusho uMnu Mathenjwa.
Leli phephandaba lizame kaningi ukuxhumana nosihlalo wesigungu esilawula isikole kodwa kwangalunga. Okhulumela uMnyango wezeMfundo KwaZulu-Natal, uMnu Kwazi Mthethwa, uthe kuyichilo ukuthi abafundi bangangena nezikhali esikoleni. Unxuse abazali nomphakathi ukuba basukume kubhekwane nale nkinga.
Maqondana nemibiko yokudliwa kwemali yesikole, uthe kubi lokho ngoba kufanele isigungu esilawula isikole saziswe ngazo zonke izinhlelo eziqhubekayo ngemali yesikole.
“Kubi futhi iyasikhathaza indaba yabafundi abangena nezikhali ezikoleni. Emasontweni amathathu adlule besikwesinye isikole eRichards Bay lapho abafundi bengena nocelemba nezibhamu.
“Siyacela ukuba abazali babambisane nathi kuseshwe abafundi ukuthi baphuma bephetheni ezikhwameni zezincwadi,” kusho uMnu Mthethwa.