Sekulele emahlombe omphakathi ngengqungqulu
Yiwona ozogcoba ingqwele yeKZN
SEKULELE emahlombe omphakathi ngengqungqulu ezogcotshwa ngoLwesihlanu ukuthatha umklomelo wokuba ngovelele kwabezemidlalo abaqhamuka esifundazweni iKwaZulu-Natal abakhombise amagalelo abonakalayo emikhakheni eyahlukene.
Lesi sifundazwe sihlelele abezemidlalo umcimbi wokubaklomelisa ukubakhuthaza ukuqhubeka nokubhebhethekisa igama laso obizwa ngeKwaZulu-Natal Sports Awards ozokuba ngoLwesihlanu kusuka ngo-18h30 eChief Albert Luthuli International Convention Centre (ICC), eThekwini.
Kulo mcimbi kuzoklonyeliswa abadlali abenze kahle kwezemidlalo kusuka mhla lulunye kuNcwaba (August) wezi-2016 kuya kumhla zingama-31 kuNtulikazi (July) wanonyaka. Ngaphandle kwabadlali, kuzophinde kuklonyeliswe nabezindaba abenze umsebenzi oncomekayo emkhakheni wezokuloba nakowokuthwebula izithombe.
Lo mcimbi uhlelwe ngumNyango WezeMidlalo wesifundazwe oholwa nguBongi Sithole-Moloi kanti unemikhakha engama-22. Kuwo kukhona umkhakha ovelele weSports Personality of the Year. Lapha kubhekwa abadlali abaphakamise ifulegi lesifundazwe emidlalweni emikhulu kubalwa nakweyomhlaba.
Umsubathi ozonqoba kulo mkhakha kufanele avotelwe ngumphakathi ngokuthumela umqhafazo enombolweni ethi: 33258, kumele ubhale igama elithi: KZNAWARDS negama lomdlali omqokayo. Umqhafazo ubiza u-R1.50.
Eminye imikhakha okuzokube kubangwa kuyona yi- Electronic Media, iJournalist of the Year, iPhotographer of the Year, i-Indigenous Games of the Year, iRecreation Body of the Year, iDevelopment Team of the Year, iFederation of the year, iVolunteer of the Year, i-Administrator of the Year, iLife Time Achievement Award, iPosthumous Award, i-Against All odds Award, iHonours Awards (MEC), iJunior Sportswoman of the Year, iJunior Sportsman of the Year, iNewcomer of the Year, iSportswoman of the Year with a Disability, iSportsman of the Year with a Disability, iTeam of the Year, iSportsman of the Year neSportswoman of the Year.
Ababanga isicoco seSports Personality of the Year yilaba:
1. UBongumusa Mthembu uyingqwele yeComrades Marathon yanonyaka kanti ungumsubathi wokuqala ompisholo wakuleli ukuwunqoba amahlandla amabili njengoba nangowezi-2014 ephume phambili kuwona. Ngempelasonto yePhasika ungene nabokuqala abali-10 kwiTwo Oceans Marathon kanti nyakenye ubuye nendondo yesiliva kwiWorld 100km eSpain. Uphethe irekhodi laseNingizimu Afrika le100km u-6:24:05.
2. UBongiwe Msomi ungukaputeni weqembu lesizwe lakuleli lebhola lomnqakiswano, iSpar Proteas, kanti nyakenye ubehola nelesifundazwe iKingdom Stars. Ubambe elikhulu iqhaza iProteas inqoba i-International Diamond League. Ube ngumdlali wonyaka kuma-Awards eKwaZulu-Natal Netball Association. Ube ngumdlali weWasp Netball Club enqobe i-English Super League kanti usanda kusayiniswa yiThunderbirds yase-Australia. Ube ngumqeqeshi weKZN U/19 B1 ephuma isibili kwiNational Championships.
3. U-Andile Phehlukwayo, ungumdlali ovuthayo weHollywoodbets Dolphin. Ungomunye wabashwibi abahamba phambili eNingizimu Afrika. Nyakenye uqokelwe eqenjini lesizwe kwiOne Day International. Udlale kahle kakhulu elakuleli libhekene ne-Ireland eBenoni. Nonyaka uphinde wabizelwa kwiSouth Africa T20. Udlale imidlalo eminingi iNingizimu Afrika ibhekene neSri Lanka, e-England ukubala nje embalwa.
4. UHenri Schoeman ubuye nendondo yethusi nyakenye kumaOlympic eBrazil, edlala iTriathlon okuwumdlalo ohlanganisa ukubhukuda, ukugijima, ubuye ugibele nebhayisikile. Ube yingqwe- le yeMandela Day Triathlon nyakenye, uyingqwele kwi-2016 ITU World Triathlon.
5. U-Imran Tahir ungomunye wabadlali abahamba phambili kwiDolphins. Uzibeke ebalazweni lomhlaba ethatha ama-wicket angama-27 emidlalweni engama-27, ayi-12 kwi-T20 emidlalweni eyisi-6.
6. UHank McGregor ungomunye wabadlali asebekhulile owenze kahle emidlalweni yezikebhe. Ushaqise abaningi nonyaka engena nabokuqala abathathu kwiDusi Canoe Marathon. Unezindondo ezimbili zegolide kwiK1 nakwiK2 ngokwahlukana.
7. UTyrone Pillay ubuye nendondo kumaParalympics nyakenye eLondon kanti usanda kungena isibili kwiGrand Prix eParis, eFrance. Ungomunye wabadlali bezokugijima abenza kahle esifundazweni.
8. UDinesha Devnarain ungu- mdlali wekhilikithi owenza kahle eqenjini lesizwe labesifazane kulo mdlalo.
9. UKeshav Maharaj nonyaka uqokelwe eqenjini lekhilikithi leSouth Africa A ebelidlala kwiChampions Trophy e-England.
10. USebastian Crawford ungomunye wabadlali owenza kahle kwiTriathlon esifundazweni kanti usanda kuqokelwa kwi-Elite Athlete Development Programme yesifundazwe ephethwe wumnyango wezemidlalo. Unqobe iSouth Africa ne-African Continental Para Triathlon.
11. UChloe Tryon ungomunye wabadlali abewenza kahle kwikhilikithi yabesifazane. Usanda kuqokelwa kwi-ICC Women World Cup ebise-England naseWales.
12. UJean-Luc du Preez weCell C Sharks nyakenye uqokelwe kwiSouth Africa A. Uqale ukudlala kumaBhokobhoko eneminyaka engama-20 ubudala.
Lesi sifundazwe sihlelele abezemidlalo umcimbi wokubaklomelisa...