UBABAZE UKUFUHLEKELA KWESITHA ENQOBA
UGAXWE ibhande le-International Boxing Organisation (IBO) Cruiserweight ebuzwile ubunzima uKevin Lerena ohlule ngamaphuzu uYouri Kalenga ongowokudabuka eDemocratic Republic of Congo (DRC) kodwa osenobuzwe baseFrance empini ebingoMgqibelo ebusuku e-Emperor’s Palace, eGauteng.
Bekulukhuni satshe ukuhlonza ukuthi ngubani ozogcotshwa njengengqwele phakathi kwala mabhokisa njengoba womabili elwe kahle.
Okucacile wukuthi uLerena ubekhombisa ubungcweti besibhakela kanti uKalenga ubelokhu elwa ngendlela eya phambili kuphela. La mabhokisa angamanxele obekwenza alokhu ecingana imihlathi yangakwesokudla.
UKalenga ubelokhu ehlasele njalo obekwenza abukeke njengomuntu oyithwele impi. Ngesikhathi ehlasela, uLerena ubekwazi ukuvika kancane bese emnemba ngezibhakela ezimbalwa.
Esimweni salolu hlobo amajaji ajwayele ukudungeka imiqondo bese enqobisa ibhokisa lohlobo lukaKalenga.
Amajaji amabili, okungelaseZimbabwe nelaseGhana, anikeze uLerena le mpi kwathi elase-United States of America (USA) lanqobisa uKalenga.
Ngemuva kwempi uLerena ukubeke kwacaca ukuthi wonke ama- jaji bekumele ayinikeze yena le mpi.
“Bengizenzela kule mpi. Amajaji kumqoka ukuthi ayibhekisise impi yalolu hlobo. Kawukwazi ukunqobisa umuntu ofuhlelekayo bese uthi uhluliwe lowo osebenzisa ikhono lokuba yibhokisa.
UKalenga ubengihlasela ngokushesha kodwa izibhakela zakhe zingayitholi indawo.
“Mina bengikwazi ukuthola ithuba elincane izibhakela zami zithole indawo. Okumqoka esibhakeleni wukuthi isibhakela sakho sithole indawo, hhayi ukuthi ufuhleleka kangakanani. Ngijabule kakhulu ngokuba yingqwele yomhlaba yize bekunzima,” kusho uLerena ogcine esejikijelana ngamazwi nethimba elesekela uKalenga.
URodney Berman weGolden Gloves Promotions obehlele lo mqhudelwano, uthe ziningi izinhlelo anazo ngoLerena. “Abantu kumele bamhloniphe uLerena ngoba usesenzele lukhulu isibhakela sakuleli.
Lo mfana unezimpi ezili-19 ezingeni elikhokhelayo. Akanaso nhlobo isipiliyoni sokulwa esigabeni sama-amesha kodwa uyaqhubeka nokwenza kahle.
Ngizoqhubeka nokumhlelela izimpi zezinga eliphezulu,” kusho uBerman obegubha iminyaka enga-40 emkhakheni wokuhlelwa kwezimpi.
UThulani Mbenge ubukise ngoMziwoxolo Ndwayana evikela ibhande lakuleli leWelterweight.
UMbenge ukhombise ukuvuthwa kulo mdlalo njengoba ebezijikijela ziyithole kahle indawo esitheni izibhakela zakhe.
Nokho le ngqwele ivumile ukuthi uNdwayana uyinikeze impi enzima.
Uthe ungene eringini azi kahle ukuthi uNdwayana akazele ukuzombuka njengoba esuka e-Eastern Cape okuyindawo ethathwa njengesizinda sesibhakela eNingizimu Afrika.
U-Antonello Maree uhlulwe nguChris Thompson empini yeCruiserweight kwathi uRowan Campbell wahlula uBenjamin Nhabetse kweyeMiddleweight.