UBINGELELE NGEGOLI KWI-EAGLES OWODUMO KWI-CHIEFS

UBINGELELE ngegoli uDavid Zulu ongumgadli omusha weRoyal Eagles ebambane neStellenbosch FC kuba ngu-1-1 koweNational First Division (NFD) izolo ngeSonto ntambama eHarry Gwala Stadium, eMgungundlovu.

Igoli lezihambi libhakuziswe enethini nguTshepo Mabua kulo mdlalo ogijinywe izolo ngenxa yomdlalo weMTN8 obungoMgqibelo eHarry Gwala lapho iMaritzburg United italajwe khona yiSuperSport United ngo-2-0 okwenze ezikaEric Tinkler zangena kowamanqamu walo mqhudelwano. UZulu ugqame esayiniswa yiKaizer Chiefs angahlalanga kuyona.

UThongathi FC luqoqe amaphuzu agcwele luguqisa iBlack Leopards ngo1-0 wegoli likaCelimpilo “Zinedine” Ngema emdlalweni weNFD obuyizolo ePrincess Magogo Stadium, KwaMashu. UThongathi lubukeka luyibambe ngakho selokhu lwenyukele kulesi sigaba.

IWitbank Spurs icazelane amaphuzu neCape Town All Stars kuba ngu-2-2 koweNFD izolo ePuma Rugby Stadium. Womabili amagoli eSpurs ashaywe nguKhethukuthula Zwane kwathi aweStars abhakuziswa enethini nguRuzaigh Gamieldien noCebo Meyiwa.

Isiyonke imiphumela yemidlalo yayizolo yeNFD imi kanje: UThongathi FC 1, Leopards 0; Spurs 2, All Stars 2; Royal Eagles 1, Stellenbosch FC 1;Pretoria University 2, Highlands 1; Richards Bay FC 0, Mthatha 0; Ubuntu Cape Town FC 0, Super Eagles 0; Tshakhuma Tsha Madzivhandila 1, Cosmos 0; Mbombela 0, Real Kings 1.

EyeMDC: Maritzburg United 2, Free State Stars 1; Golden Arrows 3, Kaizer Chiefs 2; Celtic 3, Sundowns 0, AmaZulu FC 1, Pirates 2; Baroka FC 1, Wits 1; Cape Town City 7, Polokwane 0; SuperSport 0, Platinum 0; Chippa 1, Ajax 3.

Eye-English Premiership: Swansea 0, Newcastle 1; Burnley 1, Crystal Palace 0; Stoke 2, Man United 2; Everton 0, Tottenham 3; Arsenal 3, Bournemouth 0; Leicester 1, Chelsea 2; Southampton 0, Watford 2; Brighton & Hove Albion 3, West Brom 1; Man City 5, Liverpool 0.

IWest Ham United izobhekana neHuddersfield Town kusasa ngoMsombuluko ngo-21h00.