BASONGA UKUPHENYA UMQEQESHI WE-ORLANDO PIRATES
ISONGA ngokuphenya izinqe uMilutin “Micho” Sredojevic ongumqeqeshi we-Orlando Pirates i-Ajax Cape Town uma la makilabhu esebhekene kowe-Absa Premiership kusasa ngoLwesibili ngo-19h30 e-Orlando Stadium, eSoweto.
UThabo Mosadi odlala esiswini kwi-Ajax, kuke kwavela ukuthi iBucs iyamfuna ngaphambi kokuba ajoyine i-Ajax ekuqaleni kwesizini edlule. Nokho i-University of Pretoria abedlala kuyona ngaleso sikhathi isagijima kwiPremiership ngaphambi kokugencwa yizembe, inqume ukumdayisela i-Ajax.
Lo mdlali uthi bazimisele ngokukuqeda nya ukuhlakanipha komqeqeshi wePirates, azitshela ukuthi unako.
“Sengifunde kaningi ngalo mqeqeshi kwabezindaba, uzenza ingcithabuchopho yasebholeni. Kulo mdlalo sifuna ukumphenya izin- qe. Sifuna abone ukuthi ibhola kakuyona into yokudlala. Siyakuqonda ukuthi kasizona izimfivilithi ukunqoba lo mdlalo kodwa sizoshaqisa abaningi sikhipha iPirates esibayeni sayo. Siwuhlomele nxa zonke lo mdlalo futhi kangingabazi ukuthi sizobuya namaphuzu agcwele,” kusho uMosadi.
UThabo Qalinge osesithola isikimu kwiBucs, uthi ngeke nangengozi i-Ajax ibakhiphe esibayeni sabo.
“Ikhefu ebesinalo lisisizile, sifunde izinto eziningi ebesisele ngazo. Nomqeqeshi sesiyasibamba isitayela sakhe. Indlela afuna idlalwe idinga umuntu oqatha hhayi indaba yokuganga ngoba wonke umuntu uyamaka. Ngendlela lo mqeqeshi wethu anolwazi ngayo lwebhola sizokuya kude. Ukuba kudala afika ngabe umuntu ukude ngebhola, wenza izinto ebesizibona zinzima zibe lula. Ngiyawethemba amasu akhe uma sike sangena sagxila isitayela sakhe kithina kuzokuba nzima ukuthi sihlulwe,” kusho uQalinge.