Adinwe umdlali amadodana e-Iron Duke

Ucela ukunikwa ithuba ngumqeqeshi

Ilanga - - Ezemidlalo - SENZO SOKHELA

UCASULE amadodana kaIrvin “Iron Duke” Khoza ongusihlalo we-Orlando Pirates uThabiso Kutumela ongumgadli wale kilabhu ngokona iminyakazo yezingane ekubeni emdala futhi edlala eqenjini elikhulu lale kilabhu.

IPirates Reserves iguqise AmaZulu FC Reserves ngo-2-1 koweMultiChoice Diski Challenge (MDC) ngoMgqibelo emini eSugar Ray Xulu Stadium, eClermont, ngaphandle kancane kwasePinetown. UKutumela nguyena kuphela odlala eqenjini elikhulu leBucs obeboshelwe kulesi sikimu seMDC, ushaye amagoli amabili kulo mdlalo.

Nokho bekungewona amagoli atheni bekuyizimbuzi. Umdlalo wakhe kawuzange ukhombise ukuthi udlala esikimini esikhulu kwazise nguyena obebuye one iminyakazo yezingane kube kunguyena omdala. Lo mdlali uboshelwa kulesi sikimu nje, yingoba kuvela ukuthi akekho ezinhlelweni zomqeqeshi omusha weBucs, uMilutin “Micho” Sredojevic.

IBucs ike yazama ukumubolekisa njengoba bekuvulwe iwindi lokudayiselana ngabadlali kodwa izinto zangalunga. Ike yazama nokumbolekisa kwiBaroka FC emthenge kuyona kodwa yangamthatha.

Kubukeka indlela kaKutumela ebheke ekushiyeni kwiBucs isikhanya nakakhulu njengoba amadodana kaKhoza, uNkosana noMpumi ekhombise ukungayithokozeli iminyakazo yakhe ekubeni edlala ezinganeni. Kuthiwa uKhoza la madodana akhe uwacijela ukuphatha iBucs njengoba ekhula.

Ngaso sonke isikhathi uma uKutumela ebulala iminyakazo, uNkosana okunguyena omdala ubevele anikine ikhanda, uMpumi avele abhavumule abuze ukuthi wenzani. UMpumi nguyena obebukeka esemdlalweni ngoba ubebuye amemeze esebhokisini lezicukuthwane etshela abadlali ukuthi abanyuke bahlasele. Bekubonakala ukuthi uyabazi ngoba ubebabiza ngamagama.

UNkosana obezithulele nje, aphendule ngoba nakhu ekhulunyiswa ngumfowabo. Nokho okucacile wukuthi nakuba uKutumela ewashayile amagoli kodwa kabachazekanga ngomdlalo wakhe njengoba uMpumi ebengamukhulumi kahle kumfowabo omdala kubonakala naye ukuthi uyayibona le nto ayishoyo. Ububona ukuthi baswele amandla okumukhipha.

UKutumela ucela ithuba elanele esikimini esikhulu ukuze akhombise ukuthi igoli uyalazi.

“Selokhu ngifikile kwiPirates kangikalinikwa ithuba elanele ukuba ngiziveze ukuthi ngilishaya kanjani igoli. Kunalokho uma nginikwa ithuba ngidlaliswa ezindaweni engingazejwayele. Engikucelayo nje kumqeqeshi wukuthi anginike ithuba bese engibophela phambili, kangingabazi ukuthi ngizowashaya amagoli.

“Yikhona engikwazi kangcono ukushaya amagoli. Ngiphatheka kabi uma kuthiwa ikilabhu inenkinga phambili ngibe ngizazi ukuthi ngingayelapha le nkinga kodwa ngingalinikwa ithuba. Ngiyacela ukuba nginikwe ithuba noma yikanjani ngeke ngiphoxe,” kusho uKutumela.

Newspapers in Zulu

Newspapers from South Africa

© PressReader. All rights reserved.