ABADLALI BAKHALA NGOKUGQILAZWA YI-DOWNS
BACASULWA wukugida ndawonye abadlali beMamelodi Sundowns abashovwe kwiMultiChoice Diski Challenge (MDC) eqale ngegiya eliphezulu eSugar Ray Xulu Stadium, eClermont, entshonalanga yeTheku.
UThela Ngobeni ongunozinti wale kilabhu noSiyanda “Jojo” Zwane batshele ILANGA ukuthi sebekhathele wukuba kwiDowns. Bathi bebenethemba lokuthi le kilabhu izobakhulula ngesikhathi kuvuleke iwindi lokuthengiselana ngabadlali kodwa yabagcinela ukubashova kwiMDC.
UNgobeni ubesezintini zeSundowns Reserves iguqiswa yiBloemfontein Celtic Reserves ngo3-0 koweMDC ngoMgqibelo eClermont. NoJojo uwuqale waze wawuqeda lo mdlalo. Amagoli eCeltic ashaywe nguThabo Mile amabili noKabelo Dlamini.
Ekhuluma neLANGA emuva komdlalo uNgobeni uthe: “Ngibona sengathi impilo yami ibuyela emuva. Kumele ngithole iqhinga (lokuphuma kwiDowns) ngoba neminyaka iyahamba, kayimile.
"Kangeneme ngalesi simo engikusona. Okunzima kakhulu wukuthi inkontileka yami isalelwe yiminyaka emibili.
“Lesi sigaba ngesabafana aba- ncane ukuzibonakalisa. Nokho ngizobekezela ukuze okungenani ngizobolekiswa. Kakusho lutho ukuthi ngibhalisiwe kwiCaf Champions League, okubalulekile wukudlala esigabeni esikhulu,” kubalisa uNgobeni obebolekiswe kwiFree State Stars ngesizini edlule.
UNgobeni umiswe kabi ezintini zeDowns nguDennis Onyango wase-Uganda noKennedy Mweene waseZambia okungenye yezinto ezenze washiya phansi uWayne Sandilands wajoyina i-Orlando Pirates.
NoJojo ukhihle isililo esifana nse nesikaNgobeni ngalokho abakubiza ngokuchithelwa isikhathi ngamaBrazilian.
“Sekuphele izinyanga cishe eziyisi-8 ngagcina ukudlaliswa. Sengimdala manje ukuthi ngingajabulela ukuhola imali ngibe ngingenzi lutho.
"Konke sengikubeka phambi kukaShembe,” kusho uJojo okwelulwe inkontileka yakhe kwiDowns njengoba ibinombandela walokho nxa le kilabhu isamfuna.
Lesi simo kasibhekene nalaba badlali nje kuphela kwazise noKwanda Mngonyama obephila ngokubolekiswa kwiMaritzburg United kulokhu le kilabhu inqume ukumgcina. Nokho akekho esikimini esikhulu, ushovwe kotakalani.