I-GLENWOOD BOYS IYIZINGQWELE ZE-MCDONALD U/14
IGLENWOOD Boys High engaphansi koMlazi District ithole ithuba lokuyomela iKwaZulu-Natal emidlalweni kazwelonke yeMcDonald U/14 Cup ezoqala mhla zizine isongwe ziyisi-7 kuMfumfu (October) kophezulu eGauteng.
Lesi sikole sihlule uMthwazi waseMkhanyakude ngo-5-4 sekukhahlelwa amaphenathi kowamanqamu wokukhipha umakhonya wesifundazwe ngoMgqibelo eBloemfontein. Umdlalo ubuphele zibambene ngo-2-2 esikhathini esejwayelekile.
Nasemidlalweni yeKay Motsepe Cup ngeledlule eNewcastle, kuthiwa iGlenwood ilidlale lonke ibhola kodwa kwasho ukuthi beyingekho emithanjeni yonondweba.
Imidlalo yesifundazwe yeMcDonald ibihlanganiswe neyaseFree State njengoba izifundazwe sezidlala ngambili kulo mqhudelwano.
Isifundazwe ngasinye simelwa yisikole esisodwa ezingeni likazwelonke.
UNomthandazo Mpanya onguSihlalo weSouth African Schools Football Association (Sasfa) uMlazi District, uyincome kakhulu iGlenwood ngokudlala ibhola eliseqophelweni eliphezulu. Uthi ubona emakhulu amathuba okuthi lesi sikole senze kahle nasezingeni likazwelonke.
Unxuse nezinye izikole ezixube izinhlanga ngaphansi kwesifunda sakhe ukubamba iqhaza emidlalweni yezikole edidiyelwa yiSasfa ngoba isikhombise kaningi ukuthi iyakwazi ukukhiqiza abadlali nokubumbanisa umphakathi.
Ithimba laKwaZulu-Natal beliholwa nguZibuse Ncube onguSihlalo weSasfa esifundazweni obehambisana noKhulezweni “Khurah” Buthelezi womNyango wezeMfundo kwiLembe District noPrince Zondi walo mNyango kwiPinetown District.