UKatsande nekhambi kwiChiefs
Ukhulumela umgadli ongumkhaya wakhe
UWILLARD “Salt & Vinegar” Katsande waseZimbabwe oyinjini yeKaizer Chiefs ubona u-Evans Rusike ( osesithombeni) ongumgadli weMaritzburg United engaba yisixazululo enkingeni ebhekene nale kilabhu phambi kwamapali.
IChiefs izodudulana neCape Town City kowe-Absa Premiership ngoLwesithathu ngo-19h30 eCape Town Stadium. IChiefs iya kulo mdlalo nje, umqeqeshi wayo uSteve “Mphathi” Komphela, usenkingeni njengoba abalandeli bayo bengasamfuni.
Bafuna ahambe ngenxa yokuthi le kilabhu kayenzi kahle ngaphansi kobuholi bakhe. Nokho uKomphela ukholwa wukuthi badlala kahle, inkinga ngamagoli anqabayo. Kuphume wonke umuntu kwiChiefs ukuthungatha umgadli ozoxazulula le nkinga ebhekene nayo.
UKatsande ukholwa wukuthi uRusike angayixazulula le nkinga ebhekene nezakhe.
“Kakufanele ukuthi ngabe silokhu siya kude ukuthungatha umgadli, umkhaya wami uRusike angayixazulula le nkinga esibhekene nayo. Uyalishaya igoli. Kuzofanele ikilabhu izame ukumlanda uma kuvulwa iwindi lokudayiselana ngabadlali ngoba siyamdinga.
“Nami ngizozama ukukhuluma nabaphathi ngodaba lwakhe ngoba yena sengike ngakhuluma naye washo ukuthi angakujabulela uku- zodlala kithina,” kusho uKatsande.
Ephawula ngomdlalo weCity, uthi noma kanjani kufanele bawunqobe ukuvikela uKomphela.
“Ukuhlulwa kwethu kulo mdlalo kuzokwandisela umqeqeshi izinkinga njengoba ebhekene nengcindezi kubalandeli. Kulele kithina-ke njengabadlali ukuthi siyamvikela yini kumbe sidayisa ngaye.
"Lo mdlalo ufana nowamanqamu kufanele noma kanjani siwunqobe ukuze kwehle ulaka kubalandeli. Wona ngeke ube lula ngoba iCity kayibhenywa kodwa sizokulwela ukuwunqoba,” kusho uKatsande.
Isiyonke imidlalo yeAbsa Premiership ehlelelwe ukugijinywa phakathi nesonto imi kanjena:
NAMUHLA NGOMSOMBULUKO
EGoble Park: Free State Stars vs Mamelodi Sundowns 18h00 (SS4).
KUSASA NGOLWESIBILI
ELucas Moripe Stadium: SuperSport United vs Platinum Stars 19h30 (SS11).
E-Orlando Stadium: Orlando Pirates vs Ajax Cape Town 19h30 (SS4).
E-Old Peter Mokaba Stadium: Polokwane City vs Bloemfontein Celtic 19h30.
ENelson Mandela Bay Stadium: Chippa United vs Baroka FC 19h30.
EKing Zwelithini Stadium: AmaZulu FC vs Maritzburg United 19h30. NGOLWESITHATHU EBidvest Stadium: Bidvest Wits vs Golden Arrows 19h30 (SS11).
ECape Town Stadium: Cape Town City FC vs Kaizer Chiefs 19h30 (SS4).