USEKHATHELE WUKUMINCA OWE-PIRATES
Uhlaliswe lubhojozi yisinqumo sePSL
USEKHATHELE yimpilo yokuminca uMilutin “Micho” Sredojevic ongumqeqeshi we-Orlando Pirates ezobhekana neMaritzburg United emdlalweni we-Absa Premiership ozokuba kusasa ngo- Lwesihlanu ngo-20h00 eHarry Gwala Stadium, eMgungundlovu.
Nakuba iPirates ingakehlulwa emidlalweni yeligi selokhu kuqale isizini kodwa uSredojevic uzwakalise ukungaphatheki kahle emoyeni ngento eyenziwa ngezakhe, yokumumincisa kuyo yonke imidlalo.
“Uma ubheka le midlalo yethu (emibili) esiyinqobile, umdlalo uphela sesimincile ngenxa yokuthi kasifuni ukuqobela amathuba esiwakhayo enethini ukuze sisheshe siqede ngomdlalo bese sidlala sesikhululekile. Sisenenkinga enkulu phambi kwamapali, le nto kayingiphathi kahle emoyeni, iyangihlukumeza. Nokho kungcono ngoba kasivuzi emuva. Inkinga nje kwiligi wukuthi udinga amagoli ngoba ayakusiza ekugcineni. Kodwa ngizoyilwa le mpi, amagoli wona sisazowashaya,” kusho uSredojevic.
IBucs izobhekana neTeam of Choice ihambela phezulu njengoba ngoLwesibili ebusuku iguqise i-Ajax Cape Town ngo-1-0 wegoli likaBernard Morrison e-Orlando Stadium, eSoweto.
IBucs ibingawunqoba ngenqwaba yamagoli lo mdlalo kodwa ngenxa yokuhlulwa wukusebenzisa amathuba yagcina ithole elilodwa.
UThamsanqa Gabuza ongumgadli weBucs uke wayibhakuzisa kabili inethi kodwa unondweba wangawabala ngenxa yokuthi ubekwi-offside.
UGabuza ubegebha kahle futhi ezihlula izitobha ze-Ajax kodwa ahlulwe nje wukukala umugqa weoffside okubhekeke ukuba akujike emdlalweni weTeam of Choice.
USredojevic ephawula ngomdlalo neTeam of Choice, uthe: “Lo mdlalo yiwona ozosivezela ukuthi ukhakhayi lwethu seluqine kangakanani.
Engikuqaphele ngayo wukuthi iphethe abafana abancane futhi abasheshayo.
Kodwa-ke kuzoshiyana ukwenza, nami nginabo abafana abancane engigabe ngabo, kuzoshunqa uthuli kulo mdlalo.
“Into engihlalise lubhojozi nje yile midlalo emine esondelene (ngokuhlelwa yiPremier Soccer League - PSL). "Kangikaze ngiyibone into enjena ngiyazibuza ukuthi sizojima nini siphumule nini. Kodwa-ke sizobona khona kodwa le nto izongilimazela abadlali phela amamasela ayalimala uma egqilazwa engaphunyuzwa.”
IMaritzburg izokuya kulo mdlalo inokukhulu uku zethemba njengoba nayo ingakaze ihlulwe emidlalweni yeligi kule sizini.
NgoLwesibili ebusuku ibambane namaZulu FC ngo-1-1 eKing Zwelithini Stadium, eMlazi. Kulindeleke ukuba uFadlu Davids ocija iTeam of Choice aye kulo mdlalo ngaphandle kukaBrian Onyango noBevan Fransman abayizitobha abalimele. Amathikithi alo mdlalo atholakala ema- computicket nasezitolo zakwaShoprite/ Checkers ezweni lonke kanti abiza u-R60.
Isiyonke imidlalo ye-Absa Premiership ehlelelwe ukugijinywa ngale mpelasonto imi kanje:KUSASA NGOLWESIHLANU EHarry Gwala Stadium: Maritzburg United vs Orlando Pirates 20h00 (SS4).
ECape Town Stadium: Ajax Cape Town vs Polokwane City 20h00. NGOMGQIBELO EPeter Mokaba Stadium: Baroka FC vs Free State Stars 15h00 (SS4).
E-FNB Stadium: Kaizer Chiefs vs Bidvest Wits 18h00 (SS4).
ERoyal Bafokeng Stadium: Platinum Stars vs Chippa United 20h15. NGESONTO EPrincess Magogo Stadium: Golden Arrows vs AmaZulu FC 15h00 (SS4).