Uphendule izingane zakhe izigqila zocansi
Uqale ukuzidlwengula emuva kokuxosha unina
KUSABATSHAZWA isihluku nonya lowesilisa waseKing Dinuzulu eShowe, enyakatho-mpumalanga yeKwaZulu-Natal okuvele ukuthi udlwengule amadodakazi akhe amabili - esingeke siwadalule ukuwavikela.
Kuthiwa lona wesilisa ubesephendule izingane zakhe - okungeneminyaka eli-13 ayizalayo neneyisi-8 ubudala angayizali kodwa ezalwa yisinqandamathe sakhe - amakhosikazi akhe njengoba kuthiwa bese siside isikhathi ekwenza lokhu.
Kwenzeka lokhu nje, kuthiwa umsolwa, naye esingeke simdalule ukuvikela izingane, uke wagwetshwa phambilini ngecala lokudlwengula. Umthombo weLANGA uthi kusolwa ukuthi lena ayizalayo uqale ukuyidlwengula ngonyaka ophelile emuva kokuba eyisole ngokuthi isiyajola.
Uthi kwesinye isikhathi ubeyiphoqa ukuba imphelezele ayokha umoba kanti uhlose ukuyoyigila lo mkhuba. Ngokuthola kweLANGA, ingane ize yabikela othisha esikoleni ngalokhu ngoba ibisihlukumezekile emoyeni.
Yibona abawuhlabe bawulawula zase ziyamkhalela umsolwa emuva kokuba nodokotela ekuqinisekisile ukuthi ingane idlwenguliwe. Ngesikhathi le ngane iyiswa kudokotela iyohlolwa, kubhekwe nalena encane kwatholakala ukuthi nayo idlwenguliwe.
"Kuthiwa lo muntu uneside isikhathi eyidlwengula ingane yakhe. Ngokuzwa kwami, lo mkhuba uwuqale besahlala endaweni okuthiwa yiseNkanini khona eShowe, basuke lapho bayohlala eKing Dinuzulu lapho kuthiwa ubesaqhubeka nokuphendula izingane izigqila zocansi.
" Lena endala uqale wayisola ngokuthi isinesoka. Uyibhambabule ngenduku ethi mayikhulume iqiniso, yize ingane ibikuphi- ka lokho ngoba ingakwazi. Kuthiwa uyiqhubile ethi mayiyokhomba kubo kwesoka layo. Kusolwa ukuthi kungaleso sikhathi lapho eqale khona ukuyidlwengula ngoba kababange besaya lapho abethi mayiyokhomba khona, uyifake ndawana thize lapho efike wayidlwengulela khona,” kuqhuba umthombo
Uthi umsolwa uboshwe evele enayo le ngane eneminyaka eli-13 ubudala. Kuthe esejele unina wengane wathola omunye umuntu okuyilapho ethole khona le encane engazalwa ngumsolwa.
Kuthe uma esephuma ejele wabuyelana nonina wengane yakhe. Umthombo uthi kunesigameko lapho kuqubuke khona ingxabano phakathi kukamsolwa nonina wezingane - ongeke adalulwe - eholele ekutheni axoshe unina wezingane - okusolwa ukuthi yilapho eqale khona ukudlwengula lena eneminyaka eyisi-8 ubudala.
Okhulumela amaphoyisa KwaZulu-Natal, uLt Colonel Thulani Zwane, uthe akhona amacala okudlwengula avuliwe kwabe sekuboshwa owesilisa oneminyaka engama-39 ubudala. Umsolwa uvelile kafushane eNkantolo yeMantshi yaseShowe.
“Lena endala uqale wayisola ngokuthi isinesoka. Uyibhambabule ngenduku...