Ihlazo ejola nomntakamfowabo
Ungaphandle ngoshwele wokubulala intombi
UYAVEVA owesifazane waseZikhonkwaneni, eNseleni, eMpangeni, enyakatho-mpumalanga yeKwaZulu-Natal ngomhlola ogilwe yindodana yakhe ejola nendodakazi yomfowabo omdala osewashona.
UMnu Sifiso Makhathini (37) obeboshelwe icala lokubulala intombi yakhe, ongaphandle ngoshwele, ugonyulukile ngothando lwakhe nendodakazi yakhe eneminyaka eli-17.
Uthi sebenonyaka bethandana futhi kunzima ukuba bahlukane yize indaba isiyaziwa endaweni. ILANGA lihambele lo mndeni ukuthola kabanzi ngale mihlola.
Uninakhulu wengane, uNkz Nomusa Makhathini (62), ugeqe amagula wabonakala egcwala intukuthelo ebusweni ngesikhathi exoxa ngomjolo wendodana yakhe nomzukulu. Uthi umzukulu wakhe ulahlwe ngunina emagcekeni omuzi wakhe enezinyanga ezintathu ezelwe, wakhuliswa nguyena.
“USfiso wenza la manyala nje, unonyaka nezinyanga ephume ejele ngecala lokubulala intombi yakhe njengoba esethandana nengane yomfowabo. Uboshwe le ngane incane njengoba esebuya esebona intombi egcekeni,” kusho uNkz Makhathini.
Uthi udaba lokuthandana kwabo baqale ukulusola ngonyaka ophelile - uMnu Makhathini esanda kubuya ejele - bebona ingane ingapheli endlini yokulala kayise omncane nangendlela abebesondelene ngakhona. Uthi bagcine beyibuzile ingane ukuthi kuqhubekani phakathi kwayo noyise omncane. Utshele ILANGA ukuthi ingane kayizange inanaze, ibatshele emehlweni ukuthi iyathandana noyise omncane, wayeshela eyitshela ukuthi uyayithanda nayo yamqoma ngoba izifela ngaye.
“Siswele umgodi wokucasha ingane isitshela emehlweni ukuthi bayathandana futhi sebenesikhathi beqalile. Ngesikhathi ngibize umhlangano womndeni, kukhona namanye amalunga omphakathi, isitshele emehlweni ukuthi iyathandana noyise omncane,” kusho yena.
Uthi kubenzima ukuba bahlukane yize indaba yabo ibisikhulunywe wumndeni. Umzukulu wakhe uthi ugcine enquma ukuthatha amasaka akhe abaleke wangaziwa ukuthi ukuziphi izinkalo. UNkz Makhathini uthi ukwenze lokhu ehlangene nesoka lakhe (uyise omncane) - ubeseshiye phansi nesikole.
“Ngize ngayobika emaphoyiseni ngokunyamalala kwakhe kanti uSfiso ungibuka ubulima, uyamazi ukuthi ubalekelephi ngoba enzela ukuthi baqhubeke kahle nokuthandana. Ngize ngasizwa yiSikebhe (isigungu sezokuphepha somphakathi) ukuze umzukulu wami atholakale. Sititinye uSfiso samphoqa ukuba akhulume iqiniso, asho ukuthi uyishonisephi ingane.
Ugcine esitshelile ukuthi ingane ibalekele komunye umuzi oseMtubatuba wahamba wayosikhombisa lapho ihleli khona, sabuya nayo ingane,” kusho yena.
UNkz Makhathini uthi le nkiyankiya isiyoxazululwa nguMdali njengoba umzukulu wakhe esaqhubeka nokuzidlisa satshanyana kuyise omncane, yize bekhuziwe.
ILANGA likhulume noMnu Makhathini - obekhona kubo - ozivumele ngowakhe ukuthi ubethandana nendodakazi yomfowabo futhi uyazifela ngayo. “Kuyiqiniso, besithandana kodwa sengikhulumile nayo ingane ukuthi masihlukane ngoba le nto esiyenzayo kayilungile futhi izoqhatha umndeni. Khona kakulula ukuba sihlukane kanjalo ngoba bengimthanda, ngiyazama ukumgwema ukuba angabe eseza endlini yami. Ngihlela ukuba ngihambe lapha ekhaya ngiyothola enye indawo engizohlala kuyona, lokho kuzosisiza ukuze sihlukane kalula,” kusho uMnu Makhathini. Uthi ingane yakhe ibilinda kuze kulale uninakhulu bese inyonyobela endlini yakhe sekulele bonke abantu. Uveze ukuthi uyazisola ngento ayenzile, ubehlaselwe nguSathane.
Uqhube wathi umincele ukuthi kungenzeki ibhadi lokuthi isizithwele indodakazi yakhe njengoba bebezitika ngocansi bengalisebenzisi ijazi lomkhwenyana. Utshele leli phephandaba ukuthi unazo izintombi, bezifika kubo yize esethandana nendodakazi yomfowabo.
Uthi indodakazi ibisimbiza ngegama njengoba bebethandana. Uqhube wathi uzimisele ukukhokha noma yingani umndeni othi makahlawule ngayo ngento aye- nzile. UMnu Makhathini uphume ngoshwele ejele usengaphansi kwesandla somthetho njengoba esayina zonke isinsuku. Uboshwe ngowezi-2008 ngecala lokudubula abulale intombi yakhe, wagwetshwa iminyaka eli-16, wahlala ngaphakathi eyisi-8 waphuma ngonyaka ophelile.
Okhulumela amaphoyisa KwaZulu-Natal, uCol Thembeka Mbhele, uthi kalikho icala abangalivulela uMnu Makhathini ngenxa yokuthi ingane izisholo yona ukuthi bebethandana.