ISICELO NGOMNGCWABO WOMHOLI WASECHIBINI
KWENZIWE isicelo esiphuthumayo kumalunga eReformed St John’s Apostolic Faith Mission ngomngcwabo ka-Archbishop Amon Zuma (79) ( osesithombeni) oshone ngeledlule exinwe yizinhlungu zesifuba ezimhlasele isigubhukane.
Lo mholi waleli bandla elidume ngelaseChibini, uzofihlwa ngoMgqibelo emathuneni aseZinkawini, eChesterville, entshonalanga yeTheku, emuva kwenkonzo ezoqala ngelesi-9 ekomkhulu laleli bandla elisesigcemeni sakwa-D KwaMashu, enyakatho yeTheku.
Abaholi baleli bandla benze isicelo kubo bonke abazohambela inkonzo yokuphelezela u-Archbishop Zuma ukuba bashayelwe yihora lesi-9 ekuseni sebehleli phansi.
Ubuholi baleli bandla buzama ukugwema ukuphazamiseka kokuqala kwenkonzo ngenxa yesiminyaminya njengoba kulindeleke izinkumbi zamakholwa kubalwa naphuma ezikweni laleli bandla eliseNorth West.
UMbhishobhi Robert Mbotho ongunobhalajikelele waleli bandla, uthe: “Isifiso sethu esikhulu wukuba inkonzo iqale ngelesi-9, bese kuthi ngele-12 kuphunywe esontweni sekubhekwe emathuneni.
Yingakho-ke sinxusa ukuba abazohambela inkonzo basheshe bafike ukuze izoqala ngesikhathi, wonke umuntu esehleli phansi, kungeke kugcine sekunabamile ngoba sekuwubutatata.”
Uphethe ngokuthi zikhona ezokuthutha amakholwa ezihleliwe ukusuka esontweni sekuyiwa emathuneni yize kuvumelekile nakulabo abafuna ukusebenzisa ezabo.
U-Archbishop Zuma ushiye emhlabeni uLady-Archbishop Elizabeth Zuma nabantwana.