Ushaywe ngesithende uJuju kokaMagaqa
Kuzobe kukhala isicathulo se-ANC
NGEKE anikwe ithuba lokukhuluma emngcwabeni kaMnu Sindiso Magaqa, obeyikhansela le-African National Congress (ANC) eMzimkhulu, eningizimu yeKwaZulu-Natal uKhomanda oMkhulu we-Economic Freedom Fighters (EFF), uMnu Julius Malema, ngoMgqibelo.
Lokhu kutshelwe ILANGA nguMnu Zamo Nxumalo ongusihlalo we-ANC esiFundeni iHarry Gwala uMnu Magaqa abengaphansi kwaso.
UMnu Nxumalo uthe kabanankinga nokuthi uMnu Malema ahambele umngcwabo kodwa kumele azi ukuthi ngeke akhulume kuwona.
“Wamukelekile ukuba eze ngoba sesizwile ngomndeni ukuthi bebengabangani (uMnu Malema noMnu Magaqa) kodwa ngeke alithole ithuba lokukhuluma. Ulitholile ithuba lokuvakashela umndeni wakhuluma nawo njengomngani ngakho ngeke sibekhona isidingo sokuba ethule inkulumo emngcwabeni,” kusho uMnu Nxumalo.
Uthi umngcwabo kaMnu Magaqa uzobe wenganyelwe yiANC ngakho-ke uma kushone umholi weqembu kuwumgomo ukuthi kukhuluma abaholi balo.
“Lo mngcwabo uzobe uhanjelwe ngamalunga eqembu ngakho ngeke kube yisithombe esihle ukuba kukhulume umholi welinye iqembu.
“Siyabuhlonipha ubudlelwano bukaMnu Malema noMnu Magaqa kodwa kumele akuqonde ukuthi kuzobe kuwumngcwabo womholi we-ANC ngakho izinto zizoqhutshwa ngokohlelo lwayo,” kusho uMnu Nxumalo.
Uthe nabaholi bamadlandawonye e-ANC, okuyiSouth African Communist Party (SACP) neCongress of South African Trade Unions (Cosatu), ngeke balithole ithuba lokukhuluma.
UMnu Malema, osebenze noMnu Magaqa kwi-ANC Youth league (ANCYL) phambilini, ukusho ngaphandle kokunanaza ukuthi akakudingi ukumenywa ukuba aye emngcwabeni ngoba ngokwesintu yinto engenziwa leyo.
Uveze ukuthi uzowuhambela umngcwabo kaMnu Magaqa inqobo nje uma ezokuphepha zizoqiniswa futhi unesifiso sokwethula inkulumo yokuvalelisa umngani wakhe asebenze naye ezikhathini ezinzima.
Ngeledlule uMnu Malema uvakashele kwaMagaqa wathola ithuba lokukhuluma nomndeni waphinde wakhonjiswa nemoto eyabe ihamba lo mholi oke waba ngunobhala-jikelele weANCYL ebisenezimbobo zezinhlamvu.