"KONKE KULELE EMAGATSHENI E-ANC"
UZOLINDA amagatsha e-African National Congress (ANC) aphothule ukuphakamisa amagama abantu abafuna ezikhundleni zokuhola ngaphambi kokuba anqume ukwamukela kokuphakanyiswa kwegama lakhe umgcinimafa waleli qembu, uDkt Zweli Mkhize.
Lo mholi uthi uzimisele ukwamukela lokho okuzophakanyiswa ngamagatsha njengoba kunafuna athathe izintambo zokuhola iqembu kanti amanye afuna abe yisekela likaMnu Cyril Ramaphosa kwesokuhola.
I-ANC kulindeleke ukuba ibe nengqungquthela yokukhetha ubuholi ngoZibandlela (December) nonyaka kanti amagatsha asevulelekile ukuphakamisa amagama abaholi abafuna ezikhundleni zokuhola iqembu.
Ekhuluma esigcawini sabahleli bamaphephandaba nababhali bezepolitiki eThekwini, uDkt Mkhize uthe okwamanje ngeke akwazi ukucacisa ukuthi uzokwamukela siphi isiphakamiso phakathi kwesokuhola iqembu nesokusekela uMnu Ramaphosa.
“Ngizimisele ngokuba ngomunye wabenza umehluko eqenjini kodwa konke kulele emagatsheni ukuthi abona kanjani,” kusho uDkt Mkhize.
Uthi i-ANC inomqulu obizwa nge“Through The Eye Of The Needle” ongabasiza ekukhetheni ubuholi obudingekayo eqenjini.
Utshele izintatheli ukuthi okuseqhulwini kunoma yimuphi umholi ongase athathe izintambo, wukubumba iqembu, wukuqinisekisa ukusatshalaliswa komnotho nokubuyisa abantu ukuba baphinde bathembele kwi-ANC.
Uthi i-ANC ibhekene nezingqinamba eziningi ngakho-ke kubalulekile ukuba kubhekwane ngqo nezinkinga ezikhona ukuze kuthi kushaya isikhathi sengqungquthela yokukhetha ubuholi konke kuhamba kahle futhi namagatsha ayavumelana ngabaholi abakhethile.
“Kubalulekile ukuba namalunga aqokwe ukuya engqungqutheleni ayakuqonda okumele akwenze uma efika kuyona,” kusho yena.
Ukhale ngokugobhoza kwegazi okuqhubekayo, ikakhulukazi KwaZuluNatal. Uthe ubuholi obuphezulu kumele buyidingide ngempela le ndaba ngoba kayakhi isithombe esihle kubantu.
Mayelana nesinqumo seNkantolo eNkulu yaseMgungundlovu - ecaleni elilahle ubuholi be-ANC KwaZuluNatal - uDkt Mkhize ukubeke kwacaca ukuthi isigungu esiphezulu se-ANC sisazohlangana sisidingide ngaphambi kokuba sinqume ngesizokwenza.
Uphethe ngokukhuthaza ukuthula emalungeni e-ANC, wanxusa ukuba nasemngcwabeni kaMnu Sindiso Magaqa aziphathe kahle njengoba ezobekwa endlini yakhe yokugcina e-Ibisi eMzimkhulu, eningizimu yeKwaZulu-Natal, ngoMgqibelo.
UMnu Magaqa, obeyikhansela leANC futhi oke waba ngunobhala-jikelele we-ANC Youth League (ANC), ushone emuva kokuhlala isikhathi esibhedlela njengoba edutshulwe ngoNtulikazi (July) nonyaka.
Ushone ngesonto eledlule.