INHLANZI IZOSHELWA NGAMANZI EMASELENI
LUBHEKWE ngabomvu usuku oluzocacisa ngeqembu elizophatha uMasipala waseNdumeni, enyakatho-ntshonalanga yeKwaZuluNatal njengoba kubikwa ukuthi kawunalo uzinzo ngenxa yomdonsiswano wamandla oshisa phansi phakathi kwe-African National Congress (ANC) neNkatha Freedom Party (IFP) okumanje yiyona ewuphethe - kuzoba nokhetho lokuchibiyela mhla zingama-27 kuMandulo (September) kuwadi 3, eSthembile.
Kuzoba nalolu khetho nje, yingoba i-IFP ikhombe indlela ikhansela layo, uMnu Thembinkosi Zitha, ngoba ilisola ngokungethembeki. UMnu Zitha usolwa ngokuhlangana namaqembu aphikisayo kulo masipala ukuze kuqunjwe phansi imeya, uMnu Richard Mbatha (30) nosomlomo, uNkk Bongiwe Makhathini, uMaMbatha.
UMnu Zitha ukhonjwe indlela zingama-30 kuNhlangulana (June) kophezulu. NgoMsombuluko lo masipala ububize isigcawu sabezindaba lapho uMnu Mbatha ebatshele ngohlelo olusha analo lokulwa nobugebengu obudla lubi edolobheni iDundee, elingaphansi kukamasipala wayo. Uveze ukuthi useziphothulile izongxoxo nezinkampani ezizofaka amakhamera (CCTV) azozungeza kulo lonke leli dolobha.
“Iyangikhathaza eyokubanjwa kwenkunzi ezitolo zalapha eDundee, kusuka manje sizoqala uhlelo lokufakwa kwamakhamera azoqopha ubusuku nemini. Umuntu ungakwazi ukumcashela angakuboni kodwa ikhamera izobe ilokhu ikuveza nje. Kafushane nje, inhlanzi ishelwe ngamanzi kwizigilamkhuba eziqhumisa imishini yemali, kubanjwe inkunzi ezitolo nabantu uma bezihambela. Sizowafaka kusuka ekungeneni nakuzona zonke izinhlangothi zaleli dolobha. Kuyisifiso sami ukuba nalo ligcine linenxanxathela yezitolo njengamanye adumile,” kusho uMnu Mbatha.
Mayelana nokhetho oluzayo, uthe: “Ngifisa sengathi ngabe seludlulile. Sinozakwethu usomlomo kasisakwazi ngisho nokuhamba emigwaqweni ngenxa yezinkulumo abanye osopolitiki abasipenda ngazo bethi sikhohlakele. Ngiyaqinisa ngithi inkohlakalo ngikude kakhulu nayo. Othi nginenkohlakalo makafake icala maqede aveze ubufakazi, ngiboshwe.
"Nokho-ke nakuba kunjalo, intuthuko siyihambisa ngamandla emphakathini owasiphakamisa ukuba siwuphathele imali yawo,” kusho imeya. UNkk Makhathini uhambe emazwini kaMnu Mbatha. “Uma kwenziwa uphenyo malwenziwe. Ngiyalwemukela. Kangikaze ngithinteke enkohlakalweni. Laba abahamba bethi sidla bume imali, mabalinde kufike usuku lokhetho ngoba yilona oluzocacisa kabanzi ukuthi yiliphi iqembu elizophatha lo masipala.
"Ngikhuluma nje, ngiphoqekile ukubamba umholo wamakhansela amathathu ngenxa yokungahloniphi, adube imihlangano. Lokhu akwenze kwaze kwaba yizigaba ezine,” kusho uNkk Makhathini. Lo masipala wakhiwe yi-ANC, yi-IFP, yiDemocratic Alliance (DA) ne-Economic Freedom Fighters (EFF). I-DA kayilungenelanga lolu khetho.